Qazaqstan Prezıdenti EDB basqarma tóraǵasy Dmıtrıı Pankındi qabyldady

ASTANA. QazAqparat - Kezdesý barysynda Memleket basshysyna banktiń qyzmeti, sondaı-aq onyń budan ári damý perspektıvalary men basymdyqtary týraly málimdeldi, dep habarlady búgin Aqordanyń baspasóz qyzmeti. 

Nursultan Nazarbaev Eýrazııa damý bankiniń qurylý maqsatyna, onyń aldynda turǵan búgingi mindetterge toqtalyp, ıntegratsııalyq jobalardy qarjylandyrýdyń mańyzdylyǵyn atap ótti.

«Banktiń negizgi quryltaıshylary Qazaqstan men Reseı bolyp sanalady. Bank Eýrazııalyq ekonomıkalyq odaqtyń múddesi úshin quryldy. Jumystyń tańdalǵan baǵyty durys. Qazaqstan jaǵdaıynda nesıeni kóbine teńgemen berý múmkindigin qarastyrýdy usynamyn», - dedi Memleket basshysy.

Sondaı-aq, Qazaqstan Prezıdenti Eýrazııalyq ekonomıkalyq odaqqa múshe memleketter bastamashylyq etken shaǵyn jobalarǵa nesıeni qosa qarjylandyrý shartymen berý máselesin qarastyrýdy usyndy.

«Kólik-ınfraqurylym, sý jáne agrarlyq baǵyttaǵy ortaq jobalardy qosa qarjylandyrýǵa banktiń múmkindigi bar. Bul jobalar odaqqa múshe barlyq memleketter úshin jumys isteıtin bolady. Mundaı jobalar eń aldymen olardy usynatyn Eýrazııalyq ekonomıkalyq komıssııanyń jumysyna baılanysty bolmaq», - dedi Nursultan Nazarbaev.

D.Pankın Qazaqstan Prezıdentine jańa jobalar jónindegi sharttardyń jasalý barysy týraly, sondaı-aq banktiń nesıelik qorynyń ahýaly, onyń ótken jyl qorytyndysy boıynsha aıtarlyqtaı artqany jóninde baıandady.