Qazaqstan Prezıdenti Dýbaı bıleýshisi sheıh Muhammed ben Rashıd Ál Maktýmmen kezdesti
DÝBAI. QazAqparat - Qazaqstan Prezıdenti Qasym-Jomart Toqaev Birikken Arab Ámirlikteriniń Vıtse-prezıdenti, Premer-Mınıstri, Dýbaı bıleýshisi sheıh Muhammed ben Rashıd Ál Maktýmmen kezdesti, dep habarlaıdy QazAqparat Aqordanyń baspasóz qyzmetine silteme jasap.
Áńgimelesý barysynda eki eldiń óńirlik jáne jahandyq deńgeıdegi seriktestik máseleleri talqylandy.
Memleket basshysy Dýbaıdyń álemdegi iri qarjy jáne týrıstik ortalyqtardyń birine aınalýyna yqpal etken reformalarǵa joǵary baǵa berdi.
Taraptar tsıfrlyq ekonomıka, elektrondyq kommertsııa, zamanaýı ınfraqurylym, jasandy ıntellekt, qarjylyq qyzmet kórsetý isi, ınvestıtsııa, týrızm ındýstrııasy, qurylys pen kólik salalaryndaǵy yntymaqtastyqtyń perspektıvalaryn qarastyrdy.
Memleket basshysy Qazaqstannyń Birikken Arab Ámirlikterimen aradaǵy ekijaqty yntymaqtastyqty nyǵaıtýdyń mańyzdylyǵyn atap ótip, birlesken bıznes-jobalardyń iske asyrylýyna tyń serpin berýge nıetti ekenin jetkizdi.
– Bizdiń elimiz týrızmniń jahandyq tarıhpen baılanysty qyzmetterin ilgeriletýge daıyn. Mysal retinde Altyn Ordany alýǵa bolady. Osyǵan oraı ishki týrızmdi damytýdaǵy, ony saıahatshylar úshin tartymdy baǵyt etýdegi Ámirlikterdiń týrıstik bıznesti júrgizý tájirıbesi bizge óte mańyzdy, – dedi Qasym-Jomart Toqaev.
Sheıh Muhammed Ál Maktým Ámirlikterdiń ekonomıkanyń ártúrli sektorlaryn damytý jónindegi tájirıbeleri men bilimderin Qazaqstanmen bólisýge daıyn ekenine toqtaldy. Sonymen qatar ol Qasym-Jomart Toqaevqa Dýbaıdyń «EKSPO-2020» dúnıejúzilik kórmesine daıyndyq barysy týraly aıtty.
