Qazaqstan Prezıdenti denesinde granatanyń 31 jaryqshaǵy qalǵan Q.Úmbetovke «Halyq qaharmany» ataǵyn berdi
«Denesimen jarylaıyn dep turǵan granatany basyp jatý, óz basyn ólimge tigýmen para-par degen sóz. Nemen bitetindigin eshkim de bilmes edi. Sondyqtan erligińdi joǵary baǵalap, kózsiz batyrlyǵyń úshin rahmetimizdi aıtamyz. Qutty bolsyn», - dedi Elbasy Q.Úmbetovke «Halyq qaharmany» ataǵyn berip, aıryqsha erekshelik belgisi - Altyn juldyz ben «Otan» ordenin tabystaý barysynda.
Óz kezeginde Q.Úmbetov QR Prezıdentiniń qolynan joǵary nagrada alǵanyna qýanyshty ekendigin jetkizdi.
«Biz, Ulttyq ulan jaýyngerleri elimizdiń tynyshtyǵyn saqtaı otyryp, azamattardyń boryshtary men quqyqtaryn saqtaýyn qamtamasyz etemiz. Siz álemge tanytqan qazaq elin kózdiń qarashyǵyndaı saqtap, elimizdiń tynyshtyǵyn, halqymyzdyń qaýipsizdigin qamtamasyz ete otyryp, qyzmetimizdi adal atqaratyn bolamyz», - dedi ol.
