Qazaqstan Prezıdenti BUU aıasynda aýǵan halqyna jan-jaqty kómektiń aýqymyn keńeıtýge shaqyrdy

SIANЬ. QazAqparat – BUU aıasynda aýǵan halqyna jan-jaqty kómektiń aýqymyn keńeıtý qajet. Bul týraly «Ortalyq Azııa – Qytaı» sammıtinde QR Prezıdenti Qasym-Jomart Toqaev aıtty, dep habarlaıdy QazAqparat.

«Aýǵanstanǵa toqtalsaq, osy eldegi ahýal áli de óńir elderiniń qaýipsizdigi men turaqtylyǵyna qaýip tóndirip turǵan máseleniń biri dep sanaımyz. Bul eldegi gýmanıtarlyq daǵdarystyń aldyn alý úshin halyqaralyq qaýymdastyqtyń kúsh-jigerin qoldaýdy jalǵastyrý mańyzdy», - dedi Qasym-Jomart Toqaev.

Osy oraıda Prezıdent bir aı buryn Qazaqstan Aýǵanstanǵa kezekti kómek paketi túrinde azyq-túlik ónimderin jóneltkenin eske saldy.

«BUU aıasynda aýǵan halqyna jan-jaqty kómektiń aýqymyn keńeıtý qajet. Osy turǵyda Almatyda Ortalyq Azııa men Aýǵanstannyń ornyqty damý maqsattary jónindegi BUU-nyń óńirlik ortalyǵyn qurý bastamasy ózekti bolyp tur», - dedi Memleket basshysy.

Budan buryn habarlanǵandaı, «Ortalyq Azııa – Qytaı» sammıtine qatysýshylar Sıan deklaratsııasyna qol qoıdy.