Qazaqstan Prezıdenti BQO-da turǵyn úı qurylysynyń qarqynyn arttyrýdy tapsyrdy

Jıynǵa zııaly qaýym, ardagerler men kásipodaq uıymdary jáne jastar ókilderi, máslıhat depýtattary, memlekettik qyzmetshiler qatysty.

Memleket basshysy óńirdiń elimizdi órkendetýge qosqan úlesi men damý erekshelikterine toqtaldy.

- Qazaqstannyń damýyna oń yqpalyn tıgizetin mańyzdy ólkege erekshe kóńil bólinedi. Oblystyń geografııalyq jaǵdaıy, tabıǵı baılyǵy men óndiristik bazasy óńirdiń órkendeýine qolaıly. Búginde Aqjaıyq aımaǵy biraz salalar boıynsha eleýli jetistikterge qol jetkizip otyr, - dedi Qasym-Jomart Toqaev.

Qazaqstan Prezıdenti aýyl sharýashylyǵy áleýeti joǵary óńirde agroóndiristik keshendi damytý úshin Úkimet pen jergilikti ákimdikke tapsyrma berdi.

- Et eksportynyń kórsetkishi óte jaqsy. Degenmen, osy saladaǵy eńbek ónimdiligi tómendegen. Bul máseleni Úkimetpen birlesip, júıeli túrde sheshý qajet, - dedi Memleket basshysy.

Qazaqstan Prezıdenti oblysta áleýmettik nysandar men turǵyn úı qurylystarynyń qarqynyn arttyrýdy tapsyrdy.

- Sheteldik ınvestıtsııa esebinen eki birdeı alys aýdannyń ortalyǵyna dene shynyqtyrý jáne saýyqtyrý keshenin salý jumystary bastaldy. Bul - óte jaqsy kórsetkish. Ákimdikke Jastar jyly aıasynda barlyq aýdandardy osyndaı dene shynyqtyrý keshenderimen qamtamasyz etýdi tapsyramyn. Sonymen qatar, turǵyn úı qurylysynyń qarqynyn arttyrý qajet. Qurylys barysyn qatań baqylaýdy oblys ákimine tapsyramyn. Áleýmettik jaǵdaıy nashar jáne turmysy tómen kópbalaly otbasylardy baspanamen qamtýdy júıeli túrde retteý kerek, - dedi Memleket basshysy.

Qasym-Jomart Toqaev óńirdegi aýyz sý máselesin shuǵyl sheshý qajettigin atap ótti.

- Taza aýyzsý máselesi áli de ózekti bolyp otyr. Eldi mekenderdiń 45 paıyzy ǵana ortalyqtandyrylǵan taza aýyzsýmen qamtamasyz etilgen. Oblys ákimine Úkimetpen birlesip, 2020 jyly bul kórsetkishti 80 paıyzǵa deıin jetkizýdi tapsyramyn, - dedi Qazaqstan Prezıdenti.

Memleket basshysy aımaqtyń kólik-logıstıkalyq áleýetine erekshe toqtalyp, jergilikti joldardyń sapasyn arttyrýdyń mańyzdy ekenin atap ótti.

- Óńirdegi jol problemasy áli de kún tártibinen túspeı tur. Oblystyq mańyzy bar joldardyń 70 paıyzynyń sapasy syn kótermeıdi. Bul azamattardyń kúndelikti ómirinde qıyndyq týǵyzady, sonymen qatar, óńirdiń eksporttyq jáne tranzıttik áleýetin tómendetedi. Elbasynyń tapsyrmasyna sáıkes, Orynbor tas jolyn jóndeý jumystary, ońtústiktegi - Qaztalov, Jánibek jáne Bókeı ordasy aýdandarynda jol qurylysy bastalǵanyn bilemin. Úkimetke jergilikti ákimdikpen birlesip, 2021 jyldyń sońyna deıin osy jumystardy aıaqtaýdy tapsyramyn. Bul másele meniń jeke baqylaýymda bolady, - dedi Qasym-Jomart Toqaev.

Memleket basshysy oblystaǵy tozyǵy jetken elektr jelilerine nazar aýdardy.

- Oblystyń elektr jelileri tozǵan. Sol sebepti aýdandarda jaryqtyń jıi sónýi baıqalady. Mundaı ózekti máseleler sheshilmeı, ınvestıtsııa tartý jáne jańa jumys ornyn ashý týraly oılaýǵa bola ma? Osy problemalardy Úkimetpen birlesip, júıeli túrde sheshýdi qolǵa alý kerek, - dedi Qazaqstan Prezıdenti.

Qasym-Jomart Toqaev ashyqtyq pen jarııalylyqty odan ári damytýdy tapsyrdy.

- Barlyq deńgeıdegi ákimder azamattardyń ótinishterine der kezinde, kidirissiz jaýap berýi qajet. «Ashyq ákimdik» jobasy - osy úshin jasalǵan alǵashqy qadam. Memlekettik organdardyń jumysy «qyzmet úshin adam» emes, «adam úshin qyzmet» qaǵıdatyna beıimdelýi kerek, - dedi Memleket basshysy.

Jıyn sońynda, Qazaqstan Prezıdenti elimizdiń áleýmettik-ekonomıkalyq jáne mádenı damýyna qosqan úlesi úshin «Stroıkombınat» jaýapkershiligi shekteýli seriktestiginiń dırektory B.Nurbaevty, «Avtokombınat» jaýapkershiligi shekteýli seriktestiginiń dırektory V.Goloýhovty, Oblystyq perınataldyq ortalyǵynyń bas dárigeri N.Dmıtrıenkony jáne Syrym aýdany Q.Myrzalıev atyndaǵy orta mekteptiń tarıh pániniń muǵalimi G.Nuǵmanovany alǵys hattarmen marapattady.