Qazaqstan Prezıdenti belsendi Dýlat Aǵadildiń ólimine qatysty ispen tyńǵylyqty tanysty
NUR-SULTAN. QazAqparat - Qazaqstan Prezıdenti Qasym-Jomart Toqaev informburo.kz aqparattyq-saraptamalyq portalyna bergen eksklıýzıvti suhbatynda belsendi Dýlat Aǵadildiń ólimine qatysty pikir bildirdi, dep habarlaıdy QazAqparat tilshisi.
«Qoǵamdyq úlken rezonansqa baılanysty bul ispen tyńǵylyqty tanysyp shyqtym. Ókinishke oraı, belsendi Aǵadil júrek jetispeýshiligi saldarynan qaza tapqandyǵyn nyq senimmen qýattaı alamyn. Keri sendirýge tyrysý – demek shyndyqqa qarsy shyǵý. Qaza tapqan azamat kim bolsa da, qandaı kózqarasty ustansa da ol eń aldymen adam. Adam ómiri biregeı ári baǵa jetpeıdi. Bárimiz de Alla taǵalanyń jazmyshyna moıynsunamyz. Imandy bolsyn», – dedi QR Prezıdenti.
