Qazaqstan Prezıdenti: barshaǵa baqyt, tynyshtyq jáne bereke tileımin
ASTANA. QazAqparat - Qazaqstan Prezıdenti «Naýryz - nurly jol» dep atalǵan merekelik sharaǵa qatysty, onyń barysynda teatrlandyrylǵan mýzykalyq qoıylymdar kórsetildi jáne belgili qazaqstandyq ártister men shyǵarmashylyq ujymdardyń qatysýymen kontsert ótti.
Bul týraly Aqordanyń resmı saıtynda habarlandy.
Elorda turǵyndary men qonaqtary aldynda sóz sóılegen Nursultan Nazarbaev barsha Qazaqstan halqyn Naýryz meıramymen quttyqtady.
- Bul mereke kúnniń alǵashqy shýaqty jylýymen birge keledi. Kóptegen elder Naýryzdy jańa jyl retinde atap ótedi. Bul kúnderi adamdar bir-birimen kezdesip, ókpe-renishterin keshiredi. Іzgi ister jasap, kómek kórsetedi jáne baqyt tileıdi, - dedi Qazaqstan Prezıdenti.
Memleket basshysy Qazaqstannyń Táýelsizdik jyldary azamattary maqtan tutatyn qýatty memleketke aınalǵanyn aıtty.
- Biz bárimiz birge elimizdi búkil álemge tanyttyq. Qıyndyqtarǵa qaramastan, bizdiń halqymyz árdaıym tutastyǵyn saqtady jáne alǵa qaraı senimmen júrip otyrdy. Álemde daǵdarys kórinisteri baıqalyp otyrǵan qazirgi kezde de Qazaqstannyń olardy eńserýge qajetti resýrstary jetkilikti. Bizdiń elimiz óziniń budan ári damýynyń josparlaryn, sonyń ishinde «Qazaqstan-2050» Strategııasyn, «Nurly jol» baǵdarlamasyn, jańa áleýmettik jáne ınfraqurylymdyq nysandardyń jobalaryn ázirlep, júzege asyrýda. Osynyń bárine halyqtyń birligi, bir-birine degen qurmeti men senimi, eldiń turaqtylyǵy qajet. Eger biz tańdaǵan jolymyzdan aýytqymaı júretin bolsaq, Qazaqstannyń bolashaǵy budan da jarqyn bolady, - dedi Nursultan Nazarbaev.
Sońynda Qazaqstan Prezıdenti barshaǵa baqyt, tynyshtyq jáne bereke tiledi.
Merekelik kontsertten keıin Memleket basshysy etno-aýyldy aralap, qala turǵyndarymen áńgimelesti.
