Qazaqstan Prezıdenti áıeldiń erkekterge yqpaly jaıynda ázil aıtty
ASTANA. QazAqparat - Búgin Aqordada Qazaqstannyń áıelder qaýymy ókilderimen ótken «Kóktem shýaǵy» atty kezdesý barysynda Elbasy Nursultan Nazarbaev áıeldiń er-azamattarǵa yqpaly jaıynda ázil aıtyp berdi, dep habarlaıdy QazAqparat.
«12 jyl buryn bıliktegi áıelder úlesin 30 paıyzǵa deıin jetkizý týraly tapsyrma bergen edim. Ol kezde ol múmkin emesteı kóringen bolatyn. Memlekettik apparat negizinen erkekter boldy. Árıne, olar áıeldermen aqyldasyp otyrǵanymen sheshimdi ózderi qabyldaıtyn. Erkekter ózimshildeý. Degenmen áıelder arasynda da ondaılar kezdesip jatady. Erli-zaıyptylar ursysyp qalypty. Sonda áıeli: «Osylaı ursysa beremiz be? Kel, tatýlasaıyq ta. Ekeýimiz de kinálimiz, biraq seniń kináń aýyrlaý», degen eken», - dedi Prezıdent.
Memleket basshysynyń aıtýynsha, Májilis depýtattarynyń 27 paıyzy, óńirlerdegi máslıhattar depýtattarynyń 22 paıyzy áıelderden jasaqtalǵan.
«ıAǵnı, memlekettik máselelerdi sheshýge yqpal etedi. Memlekettik qyzmetshilerdiń «B» korpýsynyń 55 paıyzy da áıelder. Áıelderdiń 40 paıyzy mańyzdy saıası, onyń ishinde ortalyq memlekettik organdarda laýazymdardy ıelengen, 73-i rezervte. Prezıdent apparatynda da qyzdar men áıelder basym», - dedi Elbasy.
Sonymen qatar Nursultan Nazarbaev jeke kásipkerliktiń teń jartysy, shaǵyn jáne orta bıznestiń 42 paıyzy áıel azamattardyń qolynda ekendigin atap ótti.
