Qazaqstan Prezıdenti atyna quttyqtaý hattar men jedelhattar kelip túsýde
BUU Bas hatshysy Antonıý Gýterrısh quttyqtaý hatynda Qazaqstannyń kópjaqtylyq dıalogty ilgeriletý jáne BUU qundylyqtaryn qorǵaý isindegi mańyzdy rólin atap ótken.
«Sizdiń kóshbasshylyǵyńyz ben mol tájirıbeńizdiń, sonyń ishinde Birikken Ulttar Uıymyndaǵy jumysyńyzdyń arqasynda Qazaqstan halyqaralyq yntymaqtastyq modeline qyzmet etýdi jalǵastyra beretinine kúmánim joq. Ortalyq Azııa men elderińizde jumys isteıtin BUU barlyq bólimsheleri jetekshileriniń keńesi úshin preventıvti dıplomatııa jónindegi BUU óńirlik ortalyǵy qyzmetiniń aıasynda Sizben tyǵyz jumys isteýdi asyǵa kútemin, - delingen quttyqtaý hatta.
Belarýs Respýblıkasynyń Prezıdenti Aleksandr Lýkashenko Qasym-Jomart Toqaevty prezıdent saılaýyndaǵy jeńisimen quttyqtap, jaqyn arada Qazaqstanǵa resmı saparmen kelýge nıetti ekenin habarlady.
«Ózara senim men strategııalyq áriptestik qaǵıdattaryna negizdelgen qazaq-belarýs yntymaqtastyǵynyń dáıekti keńeıýi halyqtarymyzdyń múddesine jaýap beredi», - delingen quttyqtaý hatta.
Ýkraına Prezmıdenti Vladımır Zelenskıı óziniń quttyqtaý hatynda Qasym-Jomart Toqaevqa tabys, al dostas Qazaqstan halqyna beıbitshilik pen baq-bereke tiledi.
«Saılaýshylardyń Sizge artqan senimi Sizdiń bedelińizdiń joǵary jáne Qazaqstan halqyna qyzmet etýge adal ekenińizdi dáleldeıdi. Kúsh-jigerimizdi ózara biriktire otyryp, elderimiz arasyndaǵy konstrýktıvti yntymaqtastyqty nyǵaıta alamyz. Kıev pen Nur-Sultan arasyndaǵy qatynastardy damytýǵa tyń serpin berý úshin Sizdi Ýkraınaǵa saparmen kelýge shaqyramyn», - delingen jedelhatta.
Aýǵanstan Islam Respýblıkasynyń Prezıdenti Muhammed Ashraf Ǵanı dostyq qarym-qatynastardy damytyp, yntymaqtastyǵymyzdy keńeıtý úshin Aýǵanstan men Qazaqstannyń áleýeti zor ekenin atap ótken.
«Aýǵanstan Úkimeti halyqtarymyz arasyndaǵy qarym-qatynastardy odan ári nyǵaıtý úshin bar kúsh-jigerin jumsaýǵa ázir. Sizdi ótken prezıdent saılaýyndaǵy jeńisińizben quttyqtaımyn jáne elderimizdiń ortaq múddeleri úshin tabysty seriktestigimiz jalǵasa beretinine senim bildiremin», - delingen jedelhatta.
Sonymen qatar, Qasym-Jomart Toqaevtyń atyna óz quttyqtaýlaryn Oman sultany Qabýs ben Saıd, Shvetsııa koroli Karl XVI Gýstav, Armenııa Prezıdenti Armen Sarkısıan, Armenııanyń Premer-Mınıstri Nıkol Pashınıan, Parlamentaralyq Odaqtyń tóraǵasy Gabrıela Kýevas Barron, Reseı Federatsııasy Memlekettik Dýmasynyń tóraǵasy Vıacheslav Volodın, Italııanyń halyqaralyq uıymdar assotsıatsııasynyń prezıdenti Franko Frattını joldady.
