Qazaqstan Prezıdenti «Astana Ceramic» JShS-ne bardy

NUR-SULTAN. QazAqparat - Qasym-Jomart Toqaev Aqmola oblysyna jumys sapary barysynda keramıkalyq tas pen kirpish óndiretin «Astana Ceramic» jaýapkershiligi shekteýli seriktestiginiń jumysymen tanysty, dep habarlaıdy QazAqparat Aqordanyń resmı saıtyna silteme jasap.

Prezıdentke atalǵan jobaǵa memleket tarapynan kórsetilip jatqan qoldaý sharalary týraly aıtylyp, qurylys materıaldaryn óndirý tehnologııasy tanystyryldy.

Aqmola oblysynyń ákimi Ermek Marjyqpaev Qasym-Jomart Toqaevqa óńirdegi qurylys ındýstrııasynyń damýy jáne Jumyspen qamtý jol kartasynyń júzege asyrylýy jaıynda baıandady.

Memleket basshysy aımaqtaǵy qurylysty sapaly salýdyń, barlyq ınfraqurylymdyq jobalar men áleýmettik mańyzy bar nysandardy jóndeý jumystarynyń mańyzdylyǵyn atap ótti.