Qazaqstan Prezıdenti Armenııa Premer-mınıstrimen kelissóz júrgizdi
Bul týraly QazAqparat Aqordanyń resmı saıtyna silteme jasap habarlaıdy.
Kezdesý barysynda olar saýda-ekonomıkalyq baılanystardy, sonyń ishinde Eýrazııalyq ekonomıkalyq odaq aıasyndaǵy yntymaqtastyqty nyǵaıtýǵa basa nazar aýdara otyryp, Qazaqstan men Armenııa arasyndaǵy qatynastardyń damý perspektıvalaryn qarastyrdy. Taraptar halyqaralyq uıymdar aıasyndaǵy ózara is-qımyldar men Ýkraına tóńiregindegi jaǵdaıdy talqylady.
Memleket basshysy Armenııa Premer-mınıstrine iltıpat bildirip, ekijaqty yntymaqtastyqtyń qarqyndy damyp kele jatqanyn atap ótti.
– Bıyl bizdiń dıplomatııalyq qatynastarymyzdyń ornaǵanyna 30 jyl. Bul – óte mańyzdy data. Eki el arasynda joǵary deńgeılerdegi ashyq saıası dıalog jolǵa qoıylǵan. Parlamenttik, mádenı-gýmanıtarlyq baılanystarymyz damyp keledi, – dedi Prezıdent.
Memleket basshysy Armenııanyń Ujymdyq qaýipsizdik týraly shart uıymyndaǵy tóraǵalyǵyn joǵary baǵalap, qańtardaǵy qaıǵyly oqıǵalar kezinde UQShU-nyń bitimgerlik kontıngentin Qazaqstanǵa jiberý týraly sheshimdi qoldaǵany úshin Nıkol Pashınıanǵa rızashylyǵyn bildirdi.
Óz kezeginde Armenııa Úkimetiniń basshysy qonaqjaılyq kórsetkeni jáne Eýrazııalyq úkimetaralyq keńes otyrysynyń joǵary deńgeıde uıymdastyrylǵany úshin alǵys aıtty.
– Qazaqstanmen aradaǵy qarym-qatynastarymyzdyń tabysty damyp kele jatqanyna qýanyshtymyn. Qazir Eýrazııalyq ekonomıkalyq odaq formatynda ekonomıkalyq yntymaqtastyq pen Eýrazııalyq ekonomıkalyq keńistikti odan ári damytý máselelerin talqylap jatyrmyz, – dedi Nıkol Pashınıan.
Sondaı-aq Premer-mınıstr Nıkol Pashınıan UQShU-nyń daǵdarysqa qarsy áreket etý tetikterin oń baǵalap, Armenııanyń uıymǵa tóraǵalyǵy aıasynda osy máselege basymdyq beriletinin atap ótti.
