Qazaqstan Prezıdenti almatylyq sýretshige erekshe portret úshin alǵys bildirdi
Á.Sabyrjanqyzy portretti QR Prezıdentiniń aty-jónin qaıtalap jazý arqyly saldy.
«Mundaı tehnıka sýretshiler arasynda óte tanymal, sımvol grafıkasy dep atalady. ıAǵnı áldebir zattardan ne elementterden portret salý. Osyǵan uqsas jumystarym bar: Dinmuhamed Qonaev, Kereı men Jánibek handar, Kenesary han portretteri. Biraq olardy «kishkentaı adamdardan» saldym. Al munda basqasha tásil qoldanýdy jón kórdim – Prezıdentti sózderden saldym. Osylaısha, Qasym-Jomart Kemelulyna qoldaý bildirgim keldi. Sózderden sýret salý – alǵashqy tájirıbem», - deıdi Ásel.
Ol óz jumysyn Instagram-ǵa salǵan. Vıdeo búgingi kúni 3 mıllıonnan astam qaralym jınady. Bul sýretshi úshin – jańa rekord.
«Birer kún buryn Prezıdent Ákimshiliginen habarlasty, maǵan áldebir nárse bergisi keletinderin aıtty. Keıin maǵan Memleket basshysynan konvert alyp keldi. Prezıdent meniń jumysymdy kórgen eken, oǵan bári unaǵan. Hatta: «Sen sııaqty talantty jastar kóp bolsa, elimizdiń keleshegi jarqyn bolady», - dep jazylǵan. Sondaı-aq zor densaýlyq pen jemis tilegen. Shynymdy aıtsam, Prezıdenttiń ózinen mundaı reaktsııa bolady dep kútpegen edim. Sheksiz qýanyshtymyn», - deıdi sýretshi.
Onyń aıtýynsha, Prezıdenttiń portreti satylyp ketken. Qazir kartınanyń kopııasyn jasap jatyr.
Áseldiń sózinshe, ol jumys barysyn kameraǵa jıi túsiredi. Sebebi adamdar sondaı vıdeolardy qaraǵandy unatady. Sondaı-aq ol qandaıda bir tulǵany, tanymal adamdy salý ıdeıasy aıaq asty keletinin atap ótti. «Mysalǵa, Batyrhan Shúkenovtiń portreti bar. Ony Batyrdyń týǵan kúni qurmetine saldym. Gennadıı Golovkınniń portretin onyń jekpe-jegi aldynda saldym. Dımash Qudaıbergendi – onyń «Samaltaý» ánin estigennen keıin. Sondaı-aq Baýyrjan Momyshulynyń jáne ózge tanymal tulǵalardyń beıneleri salynǵan kartınalarym bar», - dedi ol.
