Qazaqstan Prezıdenti álemde qarýlanýǵa suranystyń artýy saldaryn túsindirdi
Memleket basshysy kóptegen jyldardan beri Taıaý Shyǵys pen Afrıkada áskerı is-qımyldar belsendi kezeńde qalyp otyrǵanyn, Aýǵanstandaǵy, Iraktaǵy, Ýkraınadaǵy, Taýly Qarabaqtaǵy ahýal tolyq rettelmegenin eske salyp ótti.
«Jahandyq shıelenistiń ósýi qarýlanýǵa suranysty arttyryp otyr. Ótken jyly kezekti ret áskerı shyǵystar joǵarylaı tústi jáne 1,7 trln AQSh dollaryn qurady nemese álemdik ІJÓ-niń 2,2 paıyzy deńgeıine jetti. AQSh óziniń áskerı qarjy shyǵystaryn 611 mıllıard dollarǵa deıin, Qytaı - 215 mıllıardqa deıin, Reseı - 69 mıllıardqa deıin, Úndistan 56 mıllıard dollarǵa deıin ulǵaıtty. Bul osy elderdiń barsha ulttyq kirisiniń basym bóligi. Áskerı qarjy shyǵystarynyń artýy - ol qaýipsiz álemge tóngen qater ǵana emes, sonymen qatar jerdegi damý men berekeniń naqty qajettilikterinen ekonomıkalyq ári adamı resýrstardy tıimsiz túrde basqa máselege aýdarýdy bildiredi», - dep túsindirdi N. Nazarbaev.
Budan bólek Elbasy búginde Koreı túbegindegi jaǵdaı barsha álemdi alańdatyp otyrǵanyn, bul turǵyda zymyranǵa qarsy qorǵanys, ıadrolyq qarýdy qysqartý máselelerinde iri derjavalar arasynda konsensýs joq ekenin, bul qadamdardyń barlyǵy turalap qalǵanyn sóz etti.
Osy oraıda Elbasy Qazaqstanda álemdi birinshi bolyp ıadrolyq áleýetinen óz erkimen bas tartqanyn, ıadrolyq qarýsyzdaný qozǵalysyna barynsha úles qosyp jatqanyn qadap aıtty.
