Qazaqstan Prezıdenti Aqordada áıeldermen dástúrli kezdesýde ázil aıtty
ASTANA. QazAqparat - QR Prezıdenti Nursultan Nazarbaev Qazaqstannyń áıelder qaýymy ókilderimen «Kóktem shýaǵy» kezdesýinde áıelder jóninde ázil áńgime aıtty. Aqordanyń baspasóz qyzmeti qysqasha beınekórinisti Instagramda jarııalady.
«Mektep oqýshysy «Ejelgi Grekııanyń mıfteri» kitabyn oqyp otyryp, ákesinen: «Áke, ejelgi grekter jeńisti kileń de áıel beınesinde kórsetkenderi qalaı?» dep suraıdy. Ákesi: «Úılengennen keıin - bilesiń», depti», - dep áńgimeledi Nursultan Nazarbaev.
Kezdesýde bolǵan «Astana EKSPO-2017» UK» AQ basqarýshy dırektory Maııa Egimbaeva Elbasy kóptegen ázil áńgimeler aıtyp otyrdy, osylaısha kezdesý ajaryn ashýmen qatar, óte tanymdyq jáne baısaldy oılar túıip otyrdy, dep atap ótti.
Eske salaıyq, kezdesýge Memlekettik hatshy, QR Prezıdenti janyndaǵy Áıelder isi jáne otbasylyq-demografııalyq saıasat jónindegi ulttyq komıssııa tóraıymy G.Ábdiqalyqova, Parlament Senatynyń depýtaty B.Áıtimova, Ekonomıkalyq ıntegratsııa mınıstri J.Aıtjanova, «Astana EKSPO-2017» UK» AQ basqarýshy dırektory M.Egimbaeva, sharýa qojalyǵynyń basshysy T.Qushmanova, Pedıatrııa jáne balalar hırýrgııasy ǵylymı ortalyǵynyń dırektory R.Boranbaeva, «Qazaq oıýlary» JShS dırektory T.Elekbaeva, jıhaz fabrıkasynyń basshysy E.Levına, Qaraǵandy oblysyndaǵy «Murager» mamandandyrylǵan mektep-ınternatynyń dırektory M.Nurmaǵanbetova, «Qazaq qyzy» qoǵamdyq birlestiginiń tóraıymy Q.Ábden, ánshi T.Janqul, «Delovoı mır Astana» JShS dırektory, bas redaktory Sh.Syzdyqova, aqyn A.Dáýletbaeva, kópbalaly ana J.Baıjoldınova, «Astana Opera» teatrynyń solısi J.Ǵabdýllına, «Astana Balet» teatrynyń bas rejısseri M.Abýbahrıeva, bıolog ǵalym D.Qanaeva, aýyldyq okrýg ákimi P.Oralbaeva, «Otyrar sazy» Memlekettik akademııalyq folklorlyq-etnografııalyq orkestriniń bas dırıjeri, aktrısa D.Tilendıeva, zymyrandy artıllerııalyq keme áskerı bóliminiń radıo baılanysshysy J.Ybyraeva, Aqtóbe ferroqorytpa zaýytynyń jóndeý-mehanıka tsehynyń temir kesýshisi A.Kenesarına, Qostanaı oblysy, Sarykól aýdanyndaǵy «Jastar bastamasy ortalyǵynyń» basshysy E.Danılova, aýyr atletıkadan QR eńbek sińirgen sheberi J.Japparqul, aktrısa D.Baqtybaeva, stýdent L.Mıtrohına qatysty.
