Qazaqstan Prezıdenti 9 aıda 112 796 shaqyrym jol júrdi
Onyń atap ótýinshe, QR Prezıdenti bıylǵy 20 naýryzdan beri 45 Zańǵa, 226 Jarlyqqa, 68 Ókimge qol qoıdy. Prezıdenttiń qatysýymen ótken jıyndar boıynsha 49 hattama toltyrylǵan.
«Qazaqstan Prezıdenti bıylǵy 9 aıda 112 796 shaqyrym jol júrdi. Oǵan 181 saǵat 36 mınýt ýaqyt ketken. Qasym-Jomart Kemeluly 2 qyrkúıekte Qazaqstan Prezıdenti retinde alǵash ret Qazaqstan halqyna arnalǵan Joldaýyn jarııalady. Memleket basshysy zaman talabyna saı memleket bolý úshin azamattarymyz ben memleketimizdiń múddesine sáıkes jańǵyrý úderisi birtindep júzege asatynyn atap ótti. Saıası reformalardy «asyǵystyqqa salynbaı», kezeń-kezeńimen, jan-jaqty oılastyryp oryndaý qajettigin aıtty. Joldaýda elimizdiń saıası júıesinde «Kúshti Prezıdent – yqpaldy Parlament – esep beretin Úkimet» formýlasy memleket turaqtylyǵynyń negizi sanalatynyna basa mán berildi. Sondaı-aq, Qasym-Jomart Kemeluly azamattardyń ótinish-tilekterin jedel ári tıimdi qarastyratyn «Halyq únine qulaq asatyn memleket» tujyrymdamasyn iske asyrý bárimizge ortaq mindet ekenin belgilep berdi», - dedi Berik Ýálı.
Onyń aıtýynsha, Memleket basshysynyń tapsyrmasymen QR Prezıdenti Ákimshiliginde Ótinishterdi qaraýdy baqylaý bólimi jáne Prezıdenttiń Vırtýaldy qabyldaýy ashyldy. Jalpy bul bólimge 1 tamyzdan beri 15 669 ótinish tústi, onyń 4025-i vırtýaldy qabyldaý arqyly kelgen. Kelip túsken ótinishterdiń bárine ýaqtyly ári tıisti jaýap berildi.
«Memleket basshysy naýryz aıynyń sońynda ákimder men mınıstrlerdiń bárine áleýmettik jelilerge tirkelýdi mindettedi. Bul Qasym-Jomart Kemelulynyń «Halyq únine qulaq asatyn memleket» tujyrymdamasynyń oryndalyp jatqanyn dáleldeıdi», - dedi ol.