Qazaqstan Prezıdenti Ulybrıtanııanyń memlekettik mınıstri Nýsrat Ganıdi qabyldady

Prezıdent Qasym-Jomart Toqaev Ulybrıtanııanyń bıznes jáne saýda isteri jónindegi memlekettik mınıstri Nýsrat Ganıge iltıpat bildire otyryp, Ulybrıtanııa Qazaqstannyń negizgi saýda seriktesiniń biri jáne el ekonomıkasyna ınvestıtsııa salý kórsetkishi boıynsha jetinshi ınvestor ekenin atap ótti. Kazinform bul týraly Aqordaǵa silteme jasap habarlaıdy.

Búginde Qazaqstanda 550-den astam brıtandyq kásiporyn jumys istep jatyr, olardyń arasynda Shell jáne Ernst & Young sııaqty jetekshi kompanııalar bar.

Memleket basshysynyń aıtýynsha, Qazaqstan men Ulybrıtanııa arasyndaǵy taýar aınalymy byltyr 60 paıyzǵa artyp, 1,8 mıllıard dollardy qurady.

«Biz Londonmen saýda jáne ınvestıtsııa salalaryndaǵy baılanystarymyzdy keńeıtýge múddelimiz. Brıtandyq taraptyń da Qazaqstanmen jan-jaqty yntymaqtastyqty damytýǵa nıet tanytyp otyrǵanyn erekshe atap ótkim keledi», – dedi Prezıdent.

Óz kezeginde Nýsrat Ganı qurmet kórsetkeni úshin Qasym-Jomart Toqaevqa jáne Qazaqstan halqyna rızashylyǵyn bildirip, Ulybrıtanııa tarapy ekijaqty baılanystardy damytýǵa basa mán beretinin atap ótti.