Qazaqstan Prezıdenti Túrikmenstan Halk Maslahatynyń tóraǵasy Gýrbangýly Berdimuhamedovpen kezdesti

ASTANA. KAZINFORM – Memleket basshysy Qasym-Jomart Toqaev Gýrbangýly Berdimuhamedovke túrikmen halqynyń kóshbasshysy retinde Shanhaı yntymaqtastyq uıymynyń sammıtine qatysqany úshin rızashylyǵyn bildirdi.

Prezıdent qazaq-túrikmen yntymaqtastyǵy joǵary qarqynmen damyp kele jatqanyn atap ótti.

– Túrikmenstan – beıbitshilikti, qaýipsizdikti, kópjaqty yntymaqtastyqty qamtamasyz etý turǵysynan mańyzdy ról atqaratyn óte bedeldi ári beıtarap memleket. Búgingi Astanaǵa saparyńyzdyń mańyzy aıryqsha. Eń aldymen, energetıka salasyndaǵy yqpaldastyǵymyzdyń naqty máselelerin talqylaý turǵysynan máni zor, – dedi Memleket basshysy.

Qasym-Jomart Toqaev qazaq mádenıetiniń dáriptelýine qoldaý kórsetip, Ashhabadta uly kúıshi Qurmanǵazy Saǵyrbaıulyna eskertkish ashqany úshin Gýrbangýly Berdimuhamedovke alǵys aıtty.

Gýrbangýly Berdimuhamedov ShYU sammıtine qatysýǵa shaqyrǵany jáne Qazaqstan astanasynda túrikmen aqyny Maqtymquly Pyraǵy eskertkishiniń ashylýyna jeke qoldaý kórsetkeni úshin Qasym-Jomart Toqaevqa alǵys aıtty.

– Shanhaı yntymaqtastyq uıymynyń sammıtine qurmetti qonaq retinde shaqyrǵanyńyz úshin rızashylyǵymyzdy bildiremiz. Osy halyqaralyq qurylymda beıtarap Túrikmenstannyń pikirin aıtý múmkindigine ıe boldyq. Ózińiz atap ótkendeı, energetıka salasyndaǵy máselelerdi sheshý isinde mol áleýetimiz bar, – dedi Halk Maslahatynyń tóraǵasy.

Sondaı-aq kezdesýde ónerkásip, kólik jáne logıstıka salalaryndaǵy ekijaqty yntymaqtastyqtyń qazirgi jaı-kúıi men perspektıvalary qarastyryldy.