Qazaqstan Prezıdenti Reseımen arada bilim salasyndaǵy yntymaqtastyq jóninde aıtty
ASTANA. KAZINFORM — Qazaqstan Prezıdenti Qasym-Jomart Toqaev «Sırıýs» jobasyn qoldaıtynyn jáne onyń bolashaq kadrlardy daıarlaýdaǵy mańyzdylyǵyn atap ótti.
- Elderimiz bilim, ǵylym, mádenıet jáne sport salalarynda tabysty yntymaqtastyq ornatty. Árıne, osy baılanystar halyqtarymyzdyń odan ári jaqyndasýyna yqpal etedi. Jýyrda Astanada qala turǵyndary men qonaqtary erekshe yqylaspen qabyldaǵan Qazaqstandaǵy Reseı kúnderi ótti. Mańyzdy ýaqıǵalar qatarynda byltyr elordada «Qazaqstan men Reseı máńgi dostyǵy alleıasy» jáne Máskeýde Qazaqstan men Reseı dostyǵy skveriniń ashylýyn aıtýǵa bolady. Astanada ótetin úshinshi «Bolashaq oıyndary» gýmanıtarlyq baılanystardyń, eń aldymen, elderimizdiń jastary arasyndaǵy yntymaqtastyqtyń bekı túsýine yqpal etedi, - dedi Qasym-Jomart Toqaev elimizge memlekettik saparmen kelgen Reseı Prezıdenti Vladımır Pýtınmen keńeıtilgen quramdaǵy kelissózder barysynda
Sonymen qatar Memleket basshysy «Sırıýs» jobasyna toqtaldy.
- Qazaqstandaǵy «Sırıýs» jobasyn erekshe atap ótkim keledi. Muny qoldaımyn, bolashaq mamandardy daıarlaý úshin paıdasy zor dep sanaımyn, - dedi Prezıdent.
Osy oraıda Qasym-Jomart Toqaev jaqyn arada Almaty men Astanada tıisti nysandardyń qurylysy bastalatynyn atap ótti.
Buǵan deıin habarlanǵandaı, Memleket basshysy Qasym-Jomart Toqaevtyń elimizge memlekettik saparmen kelgen Reseı Prezıdenti Vladımır Pýtındi Táýelsizdik saraıynda resmı qarsy alý rásimi ótti.
