Qazaqstan Prezıdenti men Iordanııa Koroli Astana Hub klasterine bardy
ASTANA. KAZINFORM – Qasym-Jomart Toqaev pen ІІ Abdalla ben ál-Hýseın Astana Hub halyqaralyq klasterin aralaý barysynda elimizdiń ІT jáne jasandy ıntellekt salasyndaǵy jetistikterimen tanysty. Bul týraly Aqordanyń baspasóz qyzmeti habarlady.
Astana Hub – Ortalyq Azııadaǵy eń iri ınnovatsııalyq klaster. Onda 1700-den asa ІT-kompanııa shoǵyrlanǵan. Byltyr tartylǵan jalpy ınvestıtsııa kólemi 700 mıllıon dollardan, al ІT qyzmetiniń eksporty 650 mıllıon dollardan asty.
Astana Hub bazasynda jyl saıyn on myń azamatty qamtıtyn Tech Orda, TUMO jáne Tomorrow School bilim berý, sondaı-aq Google for Startups seriktesimen birge akseleratsııa baǵdarlamalary iske asyrylýda.
Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev mártebeli meımandarǵa bıyl kúzde Astanada ashylýy josparlanyp otyrǵan AlemAI Halyqaralyq jasandy ıntellekt ortalyǵynyń tujyrymdamasyn kórsetti.
Qazaqstan Prezıdenti men Iordanııa Koroline álemdik naryqqa shyqqan otandyq kompanııalardyń ázirlemeleri tanystyryldy.
Olardyń qatarynda epsilon3ai (memlekettik sektorǵa AІ-sheshimder ázirleıtin zerthana), Qalan (Qazaqstanda jáne shet elde 1 mıllıonnan asa oqýshy paıdalanatyn matematıka páninen bilim berý platformasy), inDrive (jolaýshy jáne júk tasymaly, jetkizý qyzmetin usynatyn jahandyq platforma), KazDream (ulttyq qaýipsizdik, shekaralyq baqylaý jáne kıberqorǵaý salalarynda jumys isteıtin elimizdegi iri ІT-kompanııa) sekildi jobalar bar.
Aıta keteıik, Qazaqstan men Iordanııa arasynda birqatar mańyzdy qujat qabyldandy.