Qazaqstan Prezıdenti men Abý Dabıdiń Taq murageri Astanadaǵy mektep-lıtseıge bardy
ASTANA. KAZINFORM – Qazaqstan Prezıdenti men Abý Dabıdiń Taq murageri sheıh Halıf ben Zaıd Ál Nahaıan atyndaǵy №84 mektep-lıtseıge bardy. Bul týraly Aqordanyń baspasóz qyzmeti habarlady.
Mártebeli meımandarǵa qazirgi kezde oqý oshaǵynda 2800 bala bilim alyp, 159 pedagog eńbek etetini jóninde aqparat berildi. Bıylǵy oqý jylynda «Tsıfrly mektep» jobasy daıyndalyp, jaratylystaný jáne matematıka pánderi 7 baǵytta, atap aıtqanda, IT STEM, FAB LAB, robotty tehnıka, qoldanbaly matematıka, bıoınjenerııa, matematıkalyq modeldeý, bıohımııa salalaryna bólip oqytyldy.
Qasym-Jomart Toqaev pen sheıh Haled ben Muhammed ben Zaıd Ál Nahaıan arab tili kabınetin kórdi. Mektep oqýshylary arab tili men ádebıetin meńgerýde jetken jetistikterin tanytty.
Oqýshylar Qazaqstan Prezıdenti men Abý Dabıdiń Taq muragerine mektep mýzeıin tanystyrdy. Onda eki eldiń yntymaqtastyǵy men dostyǵyna arnalǵan kórme uıymdastyrylǵan.
Ekspozıtsııaǵa ejelgi dáýirden búginge deıingi arab álemi jóninde syr shertetin kitaptar, ulttyq kıim úlgileri men tarıhı jádigerler qoıylǵan.
Aıta keteıik, Memleket basshysy Abý Dabıdiń Taq murageri Haled ben Muhammed Ál Nahaıanmen kelissóz júrgizdi.