Qazaqstan Prezıdenti Laospen yqpaldastyqty kúsheıtýge bolatyn baǵyttardy atady
ASTANA. KAZINFORM — Qazaqstan Laospen Syrtqy ister mınıstrlikteri arasyndaǵy turaqty konsýltatsııalar tetigin iske qosýǵa múddeli. Bul týraly Laos Prezıdenti Thonglýn Sısýlıtpen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
— Búgingi kelissózderdiń nátıjesinde biz birlesken málimdemeni qabyldaımyz. Jańa ǵana biz birqatar óte mańyzdy másele boıynsha pikir almastyq. Óte mazmundy kezdesý boldy dep aıtýǵa bolady. Endi ýaǵdalastyqtardy oıdaǵydaı, tolyǵymen júzege asyrýǵa bárimiz bir ujym retinde kirisemiz. Bul qujat Qazaqstan men Laos arasyndaǵy yntymaqtastyqtyń negizgi basymdyqtaryn aıqyndaıdy. Biz ekijaqty saıası dıalogty nyǵaıta túsýge zor mán berip otyrmyz. Osy oraıda Syrtqy ister mınıstrlikteri arasyndaǵy turaqty konsýltatsııalar tetigin iske qosýǵa múddelimiz. Parlamentaralyq jáne partııaaralyq yntymaqtastyqty nyǵaıtý mańyzdy. Bul másele boıynsha biz búgin pikir almastyq, kelisim bar, pátýaǵa keldik. Osyǵan baılanysty parlamentaralyq dostyq toptaryn qurý jáne delegatsııalardyń ózara baılanysyn jolǵa qoıý qajet dep sanaımyn, — dedi Qasym-Jomart Toqaev.
Memleket basshysy Qazaqstan men Laos arasyndaǵy ekonomıkalyq ózara is-qımyldy budan ári damytýǵa áleýet tolyq jetetinin basa aıtty.
— Biz saýda, energetıka, tsıfrlandyrý, kólik jáne logıstıka, taý-ken ónerkásibi, aýyl sharýashylyǵy jáne basqa da baǵyttardaǵy yqpaldastyqty kúsheıtýge múddelimiz. Osy arqyly memlekettik deńgeıdegi jáne iskerlik ortadaǵy ózara is-qımyldy jandandyra alamyz. Sondaı-aq eki el arasyndaǵy mádenı-gýmanıtarlyq baılanystardy damytýdyń ózektiligin atap ótkim keledi. Mádenıet jáne bilim berý salalaryndaǵy yqpaldastyqty bekemdegen jón. Sonyń ishinde akademııalyq almasýlar men birlesken zertteýler júrgizý baǵytyndaǵy yntymaqtastyqty keńeıtý múmkindigi mol dep sanaımyn. Sizdiń saparyńyz seriktestigimizdiń tıimdiligin arttyryp, ony jańa deńgeıge kóterýge jol ashar dep senemin, — dedi Prezıdent.
Buǵan deıin Qasym-Jomart Toqaev Táýelsizdik saraıynda elimizge resmı saparmen kelgen Laos Prezıdentin qarsy alǵanyn jazǵan edik.
