Qazaqstan Prezıdenti Qatar Ámiri sheıh Támım ben Hamad Ál Tánımen kezdesip, kóńil aıtty

Prezıdent qýatty ári órkendegen Qatar memleketin qurýǵa sheıh Hamadtyń eleýli úles qosqanyn atap ótti.

— Ol kórnekti memleket qaıratkeri ári qazaq halqynyń dosy edi, — dedi Qasym-Jomart Toqaev.

Memleket basshysynyń aıtýynsha, qazaq-qatar qarym-qatynasynyń qalyptasyp, tabysty damýyna sheıh Hamad ben Halıfa Ál Tánı zor eńbek sińirdi.

Ol Qazaqstanǵa eki ret resmı saparmen keldi. Ámirdi 1999 jyly sáýirdegi birinshi sapary kezinde Qasym-Jomart Toqaev syrtqy saıasat vedomstvosynyń basshysy qyzmetinde qarsy alǵan.

Memleket basshysy sheıh Hamadtyń qoldaýymen Astanada alǵashqy eńseli ál-Farabı meshiti boı kótergenin, sondaı-aq Qazaqstan táýelsizdiginiń bastapqy jyldarynda birqatar áleýmettik jáne ınfraqurylymdyq jobalar júzege asqanyn rızashylyqpen eske aldy.

— Osyndaı qaraly sátte Alla Taǵaladan marqumnyń jany jánnatta bolýyn surap, duǵa etemiz, — dedi Qazaqstan Prezıdenti.

Qatar Ámiri sheıh Támım ben Hamad Ál Tánı arnaıy qoldaýy úshin Qasym-Jomart Toqaevqa rızashylyǵyn bildirip, bul Qatar men Qazaqstan halyqtary arasyndaǵy baýyrlastyq baılanystardyń aıryqsha sıpatyn kórsetetine nazar aýdardy.

Qatar tarapynyń bastamasymen memleketter basshylary qazirgi halyqaralyq ahýal, sonyń ishinde Taıaý Shyǵystaǵy jaǵdaı týraly pikir almasty.

Prezıdent Qatar Ámirin ózine qolaıly ýaqytta Qazaqstanǵa saparmen kelýge shaqyratynyn rastady. Sheıh Támım ben Hamad Ál Tánı shaqyrýdy yqylaspen qabyl aldy.

Eske salsaq, Qatardyń burynǵy ámiri, resmı túrde «Ámir áke» ataǵyn ıelengen sheıh Hamad ben Halıfa Ál Tanı 74 jasynda dúnıeden ótkeni belgili boldy.

Elde burynǵy ámirdiń qazasyna baılanysty tórt kúndik aza tutý jarııalandy.

Buǵan deıin Memleket basshysy Mońǵolııa Prezıdentine quttyqtaý jedelhatyn joldaǵanyn jazǵan edik.