Qazaqstan Prezıdenti Qasym-Jomart Toqaevtyń BUU Bas Assambleıasynyń 80-shi sessııasyndaǵy Jalpy debatta sóılegen sózi
NЬıÝ-IORK. KAZINFORM — Aqordanyń baspasóz qyzmeti Memleket basshysy Qasym-Jomart Toqaevtyń BUU Bas Assambleıasynyń 80-shi sessııasyndaǵy Jalpy debatta sóılegen sóziniń tolyq nusqasyn jarııalady.
Qurmetti Prezıdent!
Qadirli Bas hatshy!
Qurmetti delegattar!
Birikken Ulttar Uıymy seksen jyldan beri adamzatqa tóngen jahandyq syn-qaterlerdi eńserýde basty ról atqaryp keledi.
Osy jyldar aralyǵynda Uıym bizdiń ujymdyq qaýipsizdik, ıadrolyq qarýdy taratpaý, beıbitshilikti saqtaý, ósip-órkendeý, kedeılikti azaıtý, ornyqty damý jáne adam quqyǵyn qorǵaý baǵytyndaǵy ortaq kúsh-jigerimizdi ilgeriletýge bastamashy boldy.
Alaıda aqıqatqa týra qaraýymyz kerek: álem túbegeıli ózgeriske ushyrady. Ókinishke qaraı, jaqsy jaqqa qaraı ózgerdi dep aıtý qıyn.
Dál sol sebepti jer júzindegi mıllıondaǵan adam Birikkken Ulttar Uıymyna úlken úmitpen kóz tigip otyr.
Búgingi tarıhı kezdesý — ámbebap jáne balamasy joq Uıymnyń irgeli qaǵıdattary men maqsattaryna qanshalyqty beıil ekenimizdi dáleldeıtin oraıly múmkindik.
Áıtse de biz kópjaqty ınstıtýttarǵa degen senimniń daǵdarysqa ushyraǵanyn aıtpaı kete almaımyz.
Halyqaralyq quqyqty óreskel buzý «qalypty jaǵdaıǵa» aınaldy. Sonyń saldarynan álemdegi turaqtylyqqa nuqsan kelip, halyqtardyń, saıası kóshbasshylar men memleketterdiń bir-birine senimi álsireı tústi.
Qazirgideı almaǵaıyp kezeńde bárimiz BUU pozıtsııasynyń nyǵaıýyna yqpal etip, Uıymnyń qubylmaly zamanǵa beıimdelýine qolǵabys etýimiz qajet.
Ózara túsinistik pen yntymaqtastyq rýhy soǵys órtin tutandyrýdan basym bolýǵa tıis. Memleketter basshylary beıbitshilikke umtylý jolynda jaýapkershilik arqalaıdy.
Qazirgi býyn kóshbasshylarynyń áreketsizdik tanytýǵa esh quqyǵy joq. Óıtkeni onyń zardabyn kelesi urpaq tartady.
Osy oraıda Birikkken Ulttar uıymyn jan-jaqty reformalaý tolassyz talqylanatyn taqyryp emes, naǵyz strategııalyq qajettilik ekenine nazar aýdarǵym keledi.
Bizge BUU-ny reformalaý jóninde naqty usynys ázirleıtin joǵary kásibı jáne ony esh oılanbastan alǵa jyljytatyn pikirlester tobyn qurý qajet. Uıym búgingi syn-qaterlerge jáne erteńgi mindetterge saı bolýy kerek.
Birikken Ulttar Uıymyn jańǵyrtýdy kózdeıtin mundaı batyl áreket Qaýipsizdik Keńesin reformalaýdan bastalýǵa tıis.
Qaýipsizdik Keńesiniń quramyna Azııa, Afrıka jáne Latyn Amerıkasyndaǵy iri elderdiń ókilderi rotatsııa tártibimen usynylýy kerek.
Sonymen qatar Qazaqstan jaýapkershiligi bar orta derjavalardyń úni BUU Qaýipsizdik Keńesinde barynsha anyq estilýi qajet dep sanaıdy.
Іs júzinde orta derjavalar qazirdiń ózinde teńgerimdi saqtaýǵa jáne ózara senimdi nyǵaıtýǵa úles qosyp, halyqaralyq qatynasta jaǵymdy ról atqara bastady.
Uly derjavalardyń bastary birikpegende nemese barsha adamzatty alańdatatyn ózekti problemalardy sheshýge qaýqarsyzdyq tanytqanda, mundaı elder BUU aıasynda dánekerge aınalady.
XXI ǵasyrda BUU bedelin kóterý úshin Uıymǵa múshe memleketter beıbitshilik pen qaýipsizdiktiń irgesin bekemdeıtin naqty qadamdar jasaýǵa tıis.
Áıtpese, BUU únemi máseleniń saldarymen kúresýden kóz ashpaıdy. Al problemanyń túpki sebepteri ústi-ústine kóbeıe beredi.
Biz bul úderisti dál búginnen bastaı alamyz. Ol úshin Birikken Ulttar Uıymynyń Jarǵysyna beıil ekenimizdi taǵy da rastaýymyz qajet.
Egemendik, aýmaqtyq tutastyq jáne kez kelgen daýdy beıbit jolmen sheshý qaǵıdattarynyń bári múltiksiz saqtalýǵa tıis. Uıym Jarǵysyn qolaıyna qaraı qoldaný onyń bedeline nuqsan keltiredi.
Álem senimge, ashyqtyqqa jáne ortaq jaýapkershilikke arqa súıeıtin jańa konsensýsqa zárý.
Mysaly, Jarǵydaǵy Ekinshi dúnıejúzilik soǵystan beri kele jatqan «jaý memleket» erejesin halyqaralyq qoǵamdastyqtyń basym bóligi eskirgen dep sanaıdy.
Sondyqtan Jarǵyny qaıta qaraý máselesin talqylaıtyn ýaqyt keldi.
Búginde biz alańdatarlyq ahýalǵa kýá bolyp otyrmyz: qarýlanýdy shekteıtin sharttar saqtalmaıdy, demek, strategııalyq turaqtylyqtyń da irgesi sógile bastady.
2024 jyly dúnıe júzinde áskerdi jaraqtandyrýǵa ketken shyǵyn 2,7 trıllıon dollardy qurady. Bul — rekordtyq kórsetkish. Al jahandaǵy zorlyq-zombylyqtyń shyǵyny 20 trıllıon dollarǵa jýyqtady.
Sondyqtan álemdegi qaýipsizdik arhıtektýrasyn qaıta qalpyna keltirý halyqaralyq qoǵamdastyq úshin eń basty basymdyq bolýǵa tıis.
Biz ıadrolyq qarý qoldaný qaýpin kúrt azaıtýdy, ıadrolyq derjavalar arasyndaǵy joǵary deńgeıdegi dıalogty qaıta bastaýdy qoldaımyz, kópjaqty árekettiń jandanýyna kúsh salýymyz kerek dep sanaımyz.
Keń kólemde alyp qarasaq, soǵysqumarlyq mentalıtetin túp-tamyrymen joıatyn kúrdeli jumysqa kirisken jón. Bul júzege asyrýǵa bolatyn sharýa. Bastysy, memleketterdiń beıbitshilik jolynda qansha qarjy jumsap otyrǵanyn muqııat baqylasaq bolǵany.
Qazaqstan ıadrolyq qarýsyzdaný jáne jappaı qyryp-joıý qarýyn taratpaý jónindegi jańa dıalogqa daıyn. Biz ıAdrolyq qarýdy taratpaý týraly shartty kúsheıtip, ıAdrolyq synaqtarǵa jan-jaqty tyıym salý týraly sharttyń oryndalýyna túrtki bolý úshin beıresmı pikir almasýlarǵa mán bere alamyz.
Sonymen qatar biz buǵan deıin aıtqan Bıologııalyq qaýipsizdik jónindegi halyqaralyq agenttik qurý týraly usynymymyzdy júzege asyrýǵa shaqyramyz.
Qazaqstan beıbit turǵyndarǵa orasan zor zalal keltirip, jahandyq senimge selkeý túsirgen jáne halyqaralyq qaýipsizdikti álsiretken Ýkraına aınalasyndaǵy daǵdarysqa alańdaýly.
Degenmen atalǵan qaqtyǵysty toqtatý úshin ekijaqty jáne halyqaralyq deńgeıdegi dıplomatııalyq kúsh-jigerdi jalǵastyryp, qos memleket uzaq merzimdi múddelerine saı keletin saıası ıkemdilik kórsetýi kerek.
Terrıtorııalyq daý-damaıdy sheshý eshqashan ońaı bolǵan emes. Ol keleshek urpaqtyń qamy úshin eki jaqtyń da barynsha ustamdylyq pen jaýapkershilik tanytýyn talap etedi.
Óshpendilik psıhologııasy qaqtyǵysqa qatysýshy taraptardyń bitimge kelýine múmkindik qaldyrmaı, qaı-qaısysyn da qurdymǵa jiberedi.
Gazadaǵy gýmanıtarlyq daǵdarystyń aýqymy tipti qorqynyshty. Oǵan beı-jaı qaraý múmkin emes.
Bul qaqtyǵystyń tarıhı tamyry tym kúrdeli. Biz osy jaýlasýdyń túpki sebebin eskerýsiz qaldyra almaımyz.
Qazaqstan áskerı is-qımyldy dereý toqtatýǵa, beıbit turǵyndardy tolyq qorǵaýǵa jáne halyqaralyq gýmanıtarlyq quqyq aıasyndaǵy kómektiń kedergisiz jetýin qamtamasyz etýge shaqyrady.
Biz eki memlekettiń beıbit qatar ómir súrýine negizdelgen sheshimdi quptaımyz ári BUU-nyń jetekshi rólin moıyndaımyz.
Qazaqstan Taıaý Shyǵystaǵy óńirlik bitimgerlikke baǵyttalǵan Arabtyń beıbit bastamasy, Nıý-Iork deklaratsııasy, Ibrahım kelisimi sekildi dıplomatııalyq usynymdardy qoldaıdy.
Eger kóshbasshylyq pen saıası erik-jiger bolsa, bul qujattar arazdyqty yntymaqtastyq pen ortaq ıgilikke aınaldyrýǵa bolatynyn kórsetedi.
Sondaı-aq biz AQSh Prezıdentiniń araaǵaıyndyǵymen Ázerbaıjan men Armenııa qarym-qatynasynyń qalypqa túskenin erekshe yqylaspen qabyl aldyq.
Bul dıplomatııa men parasatty sheshimniń arqasynda uzaq jylǵa jalǵasqan kez kelgen qaqtyǵysty retteýge bolatynyn dáleldedi.
Qazaqstan osy qaǵıdatqa súıenip, daýdy ýshyqtyrǵannan góri dıplomatııaǵa júginýdi, kúsh qoldanǵannan góri dıalog júrgizýdi jón dep sanaıdy.
Qazirgi geosaıası shıeleniske qarap, keıbir saıasatkerler «órkenıetter qaqtyǵysynan qashyp qutyla almaımyz» degen pikir aıtyp júr.
Alaıda mundaı alaýyzdyq taǵdyrdyń jazýy emes, olardyń saıası tańdaýy.
Ǵylym, medıtsına, sport, din jáne mádenıet sııaqty jahandyq ıgilikter geosaıası bólinistiń quralyna aınalmaýǵa jáne sanktsııa salýǵa sebep bolmaýǵa tıis. Adamzat ómirindegi bul izgi qundylyqtar bizdi gýmanızm ıdeıasyna biriktiredi.
Saıasatkerler jaýapkershilikten jurdaı málimdeme jasaǵanda nemese din men bolmysty saıası upaıyn túgendeý úshin bura tartyp, aǵat áreketke barǵanda senimge selkeý túsip, beıbitshilikke umtylǵan erik-jiger jasıdy.
Anyǵynda, saıası kóshbasshylyq — bir-birine kúmán-kúdikpen qarap, menmendik tanytý emes, ózara túsinistik pen qurmetten turady.
Álemge tirek bolyp turǵan toleranttylyq pen parasattylyq zań ústemdigine arqa súıeýi qajet.
Qurmetti áriptester!
Biz jikke bólinýshilik barǵan saıyn kúsheıip, ınvestıtsııa aǵynyna qatysty saıası syńarjaq ustanym beleń alǵanyna kýá bolyp otyrmyz.
Sonyń saldarynan byltyr álemdegi tikeleı shetel ınvestıtsııasynyń kólemi 1,5 trıllıon dollarǵa deıin qysqardy. Qazaqstan ınvestıtsııa salasyndaǵy halyqaralyq yntymaqtastyq aıasyn keńeıtýdi tabandy túrde jaqtaıdy. Táýelsizdiktiń 30 jylynda el ekonomıkasyna 400 mıllıard dollardan astam qarjy tartyldy.
Biz árqashan ashyq naryq qaǵıdattaryna súıenemiz ári bul memlekettik saıasatymyzdyń negizgi baǵyty bolyp qala beredi.
Eýrazııa tósinde ornalasqan Qazaqstan Azııa men Eýropa arasyndaǵy qurlyq arqyly tasymaldanatyn júktiń 80 paıyzyna qyzmet kórsetetin logıstıkalyq hab retinde sheshýshi ról atqarady.
Biz kólik-tranzıt ınfraqurylymyna, sonyń ishinde «Bir beldeý, bir jol» bastamasyna, Soltústik — Ońtústik kólik dálizine jáne Transkaspıı kólik baǵytyna ondaǵan mıllıard dollar ınvestıtsııa salamyz.
Qazaqstan qalyptasyp kele jatqan jahandyq kólik júıesiniń ózegi sanalatyn aımaqtyq jetkizý tizbegin damytýdy jalǵastyrady.
2029 jylǵa deıin 5 myń shaqyrym jańa temirjol salýdy josparlap otyrmyz.
Elimiz Ornyqty damý maqsattaryn ulttyq kún tártibindegi basymdyqtardyń biri retinde aıqyndady. Ondaǵy mindetter memlekettik josparlaýda jáne bıýdjet jobasyn ázirlegende eskeriledi.
BUU Bas hatshysy men Uıymǵa múshe memleketterdiń qoldaýynyń arqasynda Almatyda BUU-nyń Ortalyq Azııa men Aýǵanstan úshin Ornyqty damý maqsattary jónindegi óńirlik ortalyǵy ashyldy.
Búginde Ortalyq Azııanyń birligi men ózara senimi jańasha sıpat alyp, óńir halyqaralyq beıbitshilik pen progrestiń belsendi qatysýshysyna aınaldy.
«Ortalyq Azııa bestigi» yntymaqtastyǵyn nyǵaıtýda. Sol arqyly tatý kórshilik damýǵa da, qaýipsizdikti kúsheıtýge de oń septigin tıgizetinin dáleldep otyr.
Sonyń arqasynda bizdiń óńir álemdegi negizgi seriktesterimen «Ortalyq Azııa plıýs» formatynda dıalog júrgize bastady.
Qazaqstan Aýǵanstannyń ınklıýzıvti damýyn aımaqtaǵy uzaq merzimdi beıbitshilik pen turaqtylyqty qamtamasyz etýdiń kepili dep sanaıdy.
Biz aýǵan halqyna gýmanıtarlyq kómek kórsetip, saýda, azyq-túlik qaýipsizdigi, ınfraqurylym jáne kólik tasymaly salalaryndaǵy yqpaldastyǵymyzdy jalǵastyra beremiz.
Qurmetti delegattar!
Byltyr adamzat tarıhyndaǵy eń ystyq maýsym boldy. Bul rette Ortalyq Azııada aýa temperatýrasy álemdegi ortasha kórsetkishten eki ese joǵary ekenin aıtqan abzal.
Alataý muzdyqtary tez erı bastady. Bul mıllıondaǵan halyqtyń sý jáne azyq-túlik qaýipsizdigine qater tóndiredi.
Qazaqstan Aral qasiretinen sabaq aldy. Josparly is-áreketimizdiń arqasynda, sonyń ishinde halyqaralyq deńgeıdegi yntymaqtastyq nátıjesinde teńizdiń soltústik bóligin saqtap qaldyq.
Halyqaralyq Araldy qutqarý qorynyń tóraǵasy retinde elimiz bul mańyzdy baǵyttaǵy belsendi jumysty jalǵastyrady.
Degenmen Kaspıı teńizi kúnnen kúnge tartylyp barady. Bul bir óńirdiń ǵana problemasy emes, jahandyq deńgeıde dabyl qaǵatyn máselege aınaldy.
Sondyqtan aımaqtaǵy seriktesterimizdi jáne barsha halyqaralyq qoǵamdastyqty Kaspııdiń sý qoryn saqtaý úshin jedel sharalardy birlese qabyldaýǵa shaqyramyz.
Byltyr Qazaqstan Frantsııa, Saýd Arabııasy jáne Dúnıejúzilik bankpen birlesip One Water sammıtin ótkizdi.
Bolashaqta sý tapshylyǵyn boldyrmaý maqsatynda anaǵurlym tyǵyz úılestirý, ınvestıtsııa jáne ornyqty sheshim qajet.
Atalǵan máseleni kún tártibine shyǵarý úshin elimiz Birikken Ulttar Uıymymen jáne basqa halyqaralyq qurylymdarmen seriktese otyryp, kelesi jyly sáýir aıynda Astanada Óńirlik ekologııalyq sammıt uıymdastyrady.
Qorshaǵan ortany qorǵaý salasyndaǵy mindettemelerimiz aıasynda elimizde «Taza Qazaqstan» jalpyulttyq aktsııasy júzege asyrylyp jatyr. Bul qozǵalys tazalyqqa, qoqys jınaýǵa jáne ekologııalyq aǵartýshylyqqa atsalysatyn mıllıondaǵan eriktini ortaq iske jumyldyrady.
Qazaqstannyń bastamasymen BUU 2026 jyldy Ornyqty damý maqsattary jolyndaǵy Halyqaralyq eriktiler jyly dep jarııalady. Uıymǵa múshe memleketterdiń bárin osy mańyzdy bastamaǵa qoldaý bildirip, yntymaqtastyq ornatýǵa shaqyramyz.
Osy oraıda Bas Assambleıaǵa 22 sáýirdi Halyqaralyq jer sharyn kógaldandyrý kúni dep jarııalaıtyn qarar qabyldaýdy usynamyn.
Qymbatty dostar!
Qazaqstan jasandy ıntellektini tehnologııalyq jetistik dep qana emes, adamzat progresine qozǵaý salatyn zor tabys retinde qarastyrady.
Alaıda jasandy ıntellektini damytýdyń táýekelderi de bar. Atap aıtqanda, ol tehnologııalyq, ekonomıkalyq jáne geosaıası teńsizdikterdiń kúsheıýine ákeledi. Sondaı-aq etıka normalary bul evolıýtsııanyń sońynda qalyp qoıýyna jol bermeýimiz kerek.
Ádilettilik, jaýapkershilik jáne adam quqyqtaryn qorǵaý máseleleri jedel ári naqty sheshilýge tıis.
Bul úshin ár el JI artyqshylyqtaryn paıdalana alatyndaı ujymdyq kúsh-jiger qajet.
Qazaqstan BUU aıasynda Jasandy ıntellektini basqarý boıynsha jahandyq dıalogtyń bastalýyn qoldaıdy.
JI salasyndaǵy qaýipsizdik, ınklıýzıvtilik jáne adamǵa baǵdarlaný mindetti túrde eskerilýi úshin atalǵan platforma jumysyna belsendi túrde atsalysýǵa daıynbyz.
Qazaqstanda jasandy ıntellekt ekonomıka men memlekettik qyzmet kórsetýdiń barlyq sektoryna engiziledi.
Qazirdiń ózinde ony júzege asyrýdyń bazalyq ınfraqurylymy jasaqtalyp jatyr. Daryndy jas mamandarymyz muny iske asyrýǵa ázir.
Bizdiń strategııalyq maqsatymyz — úsh jyldyń ishinde Qazaqstandy tolyq tsıfrlanǵan elge aınaldyrý.
Jappaı tsıfrlandyrý jáne jasandy ıntellektini keńinen qoldaný elimizdiń ulttyq basymdyǵyna aınaldy.
Elektrondyq úkimet ulttyq damý strategııamyzdyń negizgi elementi sanalady.
Memlekettik qyzmet kórsetýdiń shamamen 90 paıyzy tsıfrlyq formatta usynylady.
Jýyrda Qazaqstanda eń qýatty ulttyq sýperkompıýter iske qosyldy.
Degenmen JI men avtomattandyrý kóptegen elde jumys oryndarynyń qysqarýyna ákelýi múmkin.
Sondyqtan tsıfrlyq progress kásiptik bilim berýmen qatar júrgizilýi qajet.
Qazaqstan jumyspen qamtýdy arttyryp qana qoımaı, kásiptik mamandyqtardyń mártebesin kóterýdi asa mańyzdy dep sanaıdy.
Hanymdar men myrzalar!
Jahanda turaqsyzdyq beleń alǵan kezeńde Ádiletti Qazaqstan qurýdy kózdegen jańǵyrý saıasatyn batyl júrgizip jatyrmyz.
Sońǵy úsh jylda bizdiń aımaqta buryn-sońdy bolmaǵan saıası jáne ekonomıkalyq reformalar jasaldy.
Jalpyulttyq referendým arqyly Prezıdentti jeti jylǵa bir merzimge saılaıtyn norma engizildi. Bul demokratııa qaǵıdattaryna saı eseptilikti kúsheıtedi.
Biz «Kúshti Prezıdent — yqpaldy Parlament — esep beretin Úkimet» formýlasyn ustanamyz.
Qazaqstandy jańǵyrtý ustanymyn basshylyqqa ala otyryp, elimizde bir palataly Parlament qurý máselesin jalpyulttyq referendýmǵa shyǵarýdy usyndym.
Maqsatymyz — saıası júıeniń qoǵam suranysyna saı ashyqtyǵy men tıimdiligin arttyryp, ony udaıy jetildirý.
Bul reformalardyń basty qaǵıdasy: Zań jáne tártip bárinen joǵary turýy kerek.
Biz parasattylyqqa jáne zań ústemdigine arqa súıeıtin basqarý júıesi ǵana qoǵamdyq tártipti qamtamasyz etip, azamattardyń quqyǵyn qorǵaýǵa múmkindik beredi dep sanaımyz.
Bul halyqaralyq ınvestıtsııalarǵa, saýda baılanysyna jáne eldiń qarqyndy damýyna ońtaıly jaǵdaı jasaıdy.
Zańdy múltiksiz saqtaıtyn azamattardyń múddesin qorǵaý — ádilettilikke, esep berýge jáne ózara qurmetke negizdelgen basty basymdyqtarymyzdyń biri.
Qazaqstan ekonomıkasy turaqty damyp keledi.
Bıyl ekonomıkalyq ósim 6 paıyzdan asady dep kútilýde. Bul bizdiń aımaqtaǵy eń iri ekonomıkanyń ornyqtylyǵyn qýattaı túsedi.
Degenmen bul jetistikterge toqmeıilsýge bolmaıdy. Biz uzaq merzimdi damýǵa baǵyttalǵan kúsh-jigerdi jalǵastyramyz.
Qazaqstannyń energetıkalyq strategııasy tórt salaǵa negizdelgen: munaı-gaz, kómir, ýran jáne asa mańyzdy mıneraldar. Bul qundy resýrstar senimdi energetıkalyq seriktestiktiń negizi bola alady.
Klımat ózgerisi men «jasyl» kún tártibin kómir keni sekildi orasan zor energetıkalyq resýrsqa baı elder qabyldaı bermeıdi. Óıtkeni búginde ozyq tehnologııanyń arqasynda ony tazalanǵan kúıinde paıdalanýǵa bolady.
Sondyqtan biz 35 jyl ishinde elimizdi dekarbonızatsııalaý jóninde mindetteme aldyq. Tek jańartylatyn energııa kómegimen búkil energetıkalyq máseleni sheshý múmkin emes.
Aýyl sharýashylyǵy — álemdik naryqta zor áleýetke ıe jetekshi salamyzdyń biri.
Qazaqstannyń astyq eksportyndaǵy áleýeti — 12 mıllıon tonna. Bul halyqaralyq naryqtyń basym bóligin qamtıdy jáne kólik baılanystaryn jaqsartý esebinen saýdany keńeıtýdiń jańa múmkindikterine jol ashady.
Biz syrtqy saýdamyzdyń ınklıýzıvtiligi men ornyqtylyǵyn qamtamasyz ete otyryp, ony odan ári ártaraptandyrý maqsatynda barlyq negizgi halyqaralyq seriktesterimizben jáne aımaqtaǵy múddeli eldermen yntymaqtastyqty jalǵastyramyz.
Joǵary Mártebeli!
El ishindegi memlekettik basqarý reformalaryn tereńdetý jáne sheteldegi jahandyq basqarýdy qoldaý — basty baǵdarymyz. Biz bul baǵytty berik ustanamyz.
Qazaqstan araaǵaıyndyq jáne bitimger rólin jalǵastyrady. Bizdiń tańdaýymyz: ústemdik emes — tepe-teńdik, jiktelý emes — yntymaqtastyq, soǵys emes — beıbitshilik.
Biz halyqaralyq qoǵamdastyqtyń basqa da múshelerimen birlese otyryp, Birikken Ulttar Uıymynyń beıbitshilik, ádilettilik jáne yntymaqtastyq shamshyraǵy ekenin rastaýǵa daıynbyz.
Raqmet!