Qazaqstan Prezıdenti Islamabadtaǵy qastandyq áreketti qatań aıyptady

ASTANA. KAZINFORM — Memleket basshysy Pákistannyń Prezıdenti men Premer-mınıstrine kóńil aıtý jedelhatyn joldady, dep habarlaıdy Aqordanyń baspasóz qyzmeti.

Qasym-Jomart Toqaev Islamabadtaǵy lańkestik aktiniń saldarynan kóptegen adamnyń qaza tabýyna baılanysty Prezıdent Asıf Alı Zardarı men Premer-mınıstr Shahbaz Sharıfke kóńil aıtty.

— Qazaqstan Prezıdenti qastandyq áreketti qatań aıyptady. Sonymen qatar qurban bolǵan azamattar men jaraqat alǵan adamdardyń týǵan-týystaryn sabyrǵa shaqyryp, Pákistan halqynyń qaıǵysyna ortaq ekenin jetkizdi, — delingen habarlamada.

Osydan buryn Pákistan astanasy Islamabadtaǵy sheıitter meshitiniń mańynda bolǵan jarylystan kem degende 31 adam qaza tapqany belgili boldy.