Qazaqstan Prezıdenti elordada Chernogorııanyń dıplomatııalyq mıssııasyn ashýdyń mańyzyn aıtty
ASTANA. KAZINFORM — Qazaqstan naryǵyna kirgisi keletin chernogorııalyq kompanııalardy qýana qarsy alamyz. Bul týraly Chernogorııa Prezıdenti ıAkov Mılatovıchpen keńeıtilgen quramdaǵy kelissóz barysynda Memleket basshysy Qasym-Jomart Toqaev málim etti.
Prezıdent Qazaqstannyń Chernogorııamen seriktestik qarym-qatynasty jandandyrýǵa nıetti ekenin jetkizip, sońǵy jyldary turaqty sıpat alǵan joǵary deńgeıdegi saıası baılanystardyń arqasynda yntymaqtastyq qarqyndy damyp kele jatqanyna toqtaldy.
Qasym-Jomart Toqaevtyń aıtýynsha, Podgorıtsada Qazaqstan Bas konsýldyǵynyń ashylýy Astananyń ekijaqty baılanystardy barynsha keńeıtýge beıil ekenin kórsetedi.
Osy oraıda Prezıdent elordamyzda Chernogorııanyń dıplomatııalyq mıssııasyn ashý, sondaı-aq parlamentaralyq baılanystardy kúsheıtý jónindegi qarymta qadamdardyń mańyzyn atap ótti.
Memleket basshysy bıznes ókilderiniń búgingi kezdesýi men saýda palatalary arasynda qol qoıylatyn Ózara túsinistik týraly memorandým iskerlik qatynastardy damytýǵa septigin tıgizetinine senim bildirdi.
– Qazaqstan naryǵyna kirgisi keletin chernogorııalyq kompanııalardy qýana qarsy alamyz. Kásipkerlerińizge qolaıly jaǵdaı jasaýǵa daıynbyz, – dedi Prezıdent.
Budan buryn habarlanǵandaı, Qasym-Jomart Toqaev Táýelsizdik saraıynda Chernogorııa Prezıdentin qarsy aldy.
