Qazaqstan Prezıdenti EAEO-nyń tsıfrlyq damýyna qatysty usynys aıtty
ASTANA.KAZINFORM — Qazaqstanda ınnovatsııalyq jobalarǵa ınvestıtsııa kólemi eselep artyp keledi. Bul týraly búgin elordadaǵy Joǵary Eýrazııalyq ekonomıkalyq keńestiń otyrysynda Memleket basshysy Qasym-Jomart Toqaev málim etti.
Prezıdenttiń aıtýynsha, tsıfrlandyrý men jasandy ıntellekt arqyly jańa tehnologııalyq júıe qalyptastyrý kezinde derekterdi jedel óńdeý, avtomattandyrý jáne ınnovatsııany jappaı engizý tabystyń negizgi faktoryna aınala bastady. Sarapshylardyń baǵalaýy boıynsha, álemde jasandy ıntellekt tehnologııalaryna quıǵan qarjy kólemi 1 trln dollarlyq mejeden asty. Aldaǵy onjyldyqta onyń jahandyq ekonomıkadaǵy jıyntyq úlesi birneshe ese kóbeıip, 7 trln dollarǵa jetýi múmkin.
Qasym-Jomart Toqaevtyń sózine qaraǵanda, sońǵy býyndy tehnologııalar eýrazııalyq ıntegratsııanyń qýatty katalızatoryna aınalýy kerek. Bul qazirdiń ózinde júzege asa bastady. EAEO keńistiginde osy baǵyttaǵy jumys dáıekti túrde jalǵasyp keledi dep nyq senimmen aıtýǵa bolady. Transformatsııa óndiris jáne logıstıkadan bastap, aýyl sharýashylyǵy men memlekettik basqarýǵa deıingi barlyq salany qamtıdy.
- Qazaqstanda ınnovatsııalyq jobalarǵa ınvestıtsııa bes eseden astam ósti. Barlyq ınvestıtsııanyń jartysynan astamy tsıfrlyq salaǵa baǵyttalyp jatyr, - dedi Memleket basshysy.
Sonymen qatar Prezıdent EAEO-ǵa múshe elderdiń árqaısysy tsıfrlyq transformatsııanyń jekelegen baǵyttarynda aıtarlyqtaı tájirıbe jınaǵanyn atap ótti. Bul rette Memleket basshysy ulttyq quziretterdi damytýmen qatar birlesken tehnologııalyq bastamalardy qalyptastyrýǵa belsendi túrde atsalysqan jón ekenin sóz etti. Osy baǵytta úzdik tájirıbelermen jáne tıimdi sheshimdermen almasý mańyzdy.
- Bul EAEO aıasyndaǵy tsıfrlyq damýdy jedeldetip, ekonomıkalarymyzdyń básekege qabiletin arttyrýǵa múmkindik beredi, - dedi Prezıdent.
Budan buryn habarlanǵandaı, Astanada Joǵary Eýrazııalyq ekonomıkalyq keńestiń otyrysy bastaldy.
