Qazaqstan Prezıdenti Bishkektegi mektep-gımnazııasyna avtobýs syılady
BІShKEK. KAZINFORM — Bishkektegi № 33 mektep-gımnazııasynda Qazaqstan Prezıdenti Qasym-Jomart Toqaevtyń atynan bilim oshaǵyna mektep avtobýsyn syıǵa tartý jáne Memleket basshysynyń qyrǵyz tiline aýdarylǵan «Áke týraly oı-tolǵaý» kitaby tanystyryldy, dep habarlaıdy Kazinform agenttiginiń menshikti tilshisi.
Sharaǵa Prezıdent ákimshiligi, Parlament, Bilim mınıstrligi, qalalyq merııa ókilderi, shyǵarmashylyq zııaly qaýym, dıplomatııalyq korpýs pen Qazaq qaýymdastyǵy músheleri, sondaı-aq mektep oqýshylary men pedagogıkalyq ujym qatysty.
Qazaqstannyń Qyrǵyz Respýblıkasyndaǵy Elshisi Rápil Joshybaev óz sózinde erlik tarıhy bar oqý ornynda ótken saltanatty is-sharanyń sımvoldyq mánine toqtaldy.
— Uly Jeńistiń 80 jyldyǵy qarsańynda osy mekteptiń halyqtarymyzdyń ortaq tarıhyna qosqan úlesin tereń qurmetpen eske alamyz. 1940 jyly negizi qalanǵan oqý orny búginde qalalyq mańyzy bar tarıhı eskertkish sanalady. Sol kezdegi soǵys jyldarynda mektepte Frýnze jaıaý ásker ýchılışesi boldy. Kýrsanttardyń birinshi tobynda Qyrǵyzstan, Qazaqstan jáne Ózbekstannan áskerge shaqyrylǵandar boldy. Mektep avtobýsy Qazaqstan Respýblıkasynyń Prezıdenti Qasym-Jomart Toqaevtyń atynan ákesi oqyǵan mektepke qurmet belgisi retinde syıǵa tartyldy. Bul avtobýs óskeleń urpaqqa qamqorlyqtyń, bilimdi qoldaýdyń jáne laıyqty bolashaqqa senimniń belgisi, — dedi Elshi.
Sonymen qatar, qazaqstandyq dıplomat Qazaqstan Respýblıkasy Almatydaǵy Sátbaev ýnıversıtetinde № 33 Bishkek mektep-gımnazııasynyń túlekterine jataqhanada turý múmkindigimen úsh tegin bilim berý kvotasyn usynatynyn habarlady.
Qalalyq № 33 mektep-gımnazııasynyń dırektory Taalaıkúl Ashymova rızashylyǵyn bildirip, bul syılyq ata-baba rýhyna qurmet retinde qabyldanady degen pikirin aıtty.
— Qazaqstan Prezıdenti Qasym-Jomart Kemeluly Toqaevqa № 33 mektep-gımnazııasynyń barsha oqýshysynyń, ata-analar men ustazdar qaýymynyń atynan sheksiz alǵysymdy bildiremin. Syıǵa berilgen mektep avtobýsy oqýshylarǵa úlken qýanysh syılap, jańa bilimge, qýanyshty áserler men jańalyqtarǵa jol ashady. Atap aıtqanda, bul is-shara ata-babalarymyz ben Ekinshi dúnıejúzilik soǵystyń barlyq qatysýshylaryn eske alýǵa arnalǵan, baýyrlas Qyrǵyzstan men Qazaqstan halyqtarynyń tarıhyna qurmet dep sanaımyn, — dedi mektep dırektory.
Munymen qosa, is-shara barysynda Qazaqstan Respýblıkasynyń Prezıdenti Qasym-Jomart Toqaevtyń «Áke týraly oı-tolǵaý» kitabynyń qyrǵyz tiline aýdarylǵan («Atam jónúndó baıan») nusqasy tanystyryldy. Osy oraıda Qyrǵyz Respýblıkasynyń Prezıdenti Sadyr Japarovqa kitaptyń estelik nusqasyn saltanatty túrde tabys etý rásimi ótti.
Qyrǵyz Respýblıkasy Prezıdentiniń keńesshisi Arslan Koıchıev túlekteri qazaqtyń birtýar tulǵalary Raqymjan Qoshqarbaev pen Kemel Toqaev jáne basqa da ataqty batyrlar bolǵan bilim oshaǵynda ótip jatqan sharanyń mańyzdylyǵyn atap ótti.
— Qasym-Jomart Toqaevtyń «Áke týraly oı-tolǵaý» kitaby avtordyń otbasy taǵdyryna arnalǵan, ákesiniń eńsergen qıyn jyldaryn sýretteıdi. Onda 1933 jyly Qyrǵyzstanda bolǵan oqıǵaǵa qatysty kóptegen málimetter bar. Qyrǵyz jurtshylyǵy úshin Q.Toqaevtyń ómirimen jaqynyraq tanysý qyzyǵýshylyq týdyrady, sondyqtan kitapty qyrǵyz tiline Chynara Okeeva aýdarǵan. Qyrǵyzstan men Qazaqstan arasyndaǵy dostyq pen yntymaqtastyqtyń odan ári nyǵaıýyna tilektespin, — dedi ol.
Kitaptyń qyrǵyz tiline aýdarmasynyń avtor Chynara Okeeva «Áke týraly oı-tolǵaý» kitaby birneshe sebepterge baılanysty ony qatty tolqytyp, qyzyqtyrǵanyn moıyndady.
— Men bul shyǵarmamen óz ákemniń qazasyna baılanysty tereń qaıǵyrý kezeńinde tanys boldym. Sondyqtan joǵary laýazymdy (Qasym-Jomart Toqaevtyń) saıasatkerdiń ákesi týraly estelikterine arnalǵan kitabyn oqý maǵan qyzyq boldy. Eki halyqtyń qıyn jyldardaǵy ortaq tarıhy baıandalǵan tustary maǵan qatty áser etti. Otbasynyń árbir múshesine degen zor súıispenshilikke toly kitap oqyrmandy sol kezeńdegi otbasy ınstıtýtymen egjeı-tegjeıli tanystyrady, — dedi Ch. Okeeva.
Eske salsaq, jaqynda Memleket basshysy «Uly Otan soǵysyndaǵy Jeńiske 80 jyl» medali týraly Jarlyqqa qol qoıdy.