Qazaqstan Prezıdenti armıan halqynyń dosy ári beıbitshilik kópiri — Armenııa basylymy
ASTANA. KAZINFORM — «Qazaqstan Prezıdenti Qasym-Jomart Toqaev armıan halqynyń dosy ári beıbitshilik kópiri». Armenııanyń Zarkerak.am jańalyqtar portalynda dál osyndaı taqyryppen maqala jaryq kórdi. Kazinform osy maqalanyń beıresmı aýdarmasyn oqyrman nazaryna usynady.
— Sońǵy aılarda armıan-ázerbaıjan qarym-qatynasynda baıqalyp otyrǵan oń ilgerileýshilik tosyn jaıt emes. Ol — eki eldiń saıası erki ǵana emes, sonymen qatar birqatar seriktes memleket pen olardyń kóshbasshylarynyń dáıekti kúsh-jigeriniń nátıjesi. Osy turǵydan alǵanda Qazaqstan Prezıdenti Qasym-Jomart Toqaevtyń «negizgi» desek artyq aıtqandyq bolmaıtyn róli erekshe baıqalady. Toqaev alǵashqy kúnnen-aq ózin teńgerimdi ári syndarly kóshbasshy retinde tanytyp, Ońtústik Kavkazda beıbitshilik ornatý tek óńirlik qana emes, sonymen birge eýrazııalyq qaýipsizdiktiń ajyramas bóligi ekendigin únemi basa aıtyp keldi. Onyń ustanymy adamı jylylyqpen jáne Armenııa basshylyǵyna da, armıan halqyna shynaıy qarym-qatynasymen erekshelenedi. Qasym-Jomart Toqaev esh ýaqytta da jalań saıası esepti basshylyqqa alǵan emes. Barlyq tarapqa da uzaqmerzimdi tabys ákeletin sheshim tabýǵa umytyldy. Onyń araǵaıyndyq ári qoldaýshy róli Ázerbaıjannan Armenııa baǵytyna tranzıttik dáliz ashý máselesinde aıryqsha baıqaldy, — dep jazady basylym.
Maqala avtorynyń atap ótýinshe, Qazaqstannyń belsendi qatysýy men senimge ıe araǵaıyndyq qarym-qatynasy eki elge de shıelenisti tómendetip, ózara senim ahýalyn qalyptastyrýǵa septigin tıgizdi. Bul protsestiń tek ekonomıkalyq qana emes, sondaı-aq nyshandy máni bar. Ol yntymaqtastyq qarama-qaıshylyqtardy eńsere alatyndyǵyn kórsetti.
— Qasym-Jomart Toqaev basqaratyn Qazaqstan saıası araǵaıyndyqtan bólek Armenııamen ekonomıkalyq baılanystardy nyǵaıtý úshin naqty qadam jasap otyr. Armenııanyń azyq-túlik turaqtylyǵyna septigin tıgizýmen qatar aýyl sharýashylyǵy salasyndaǵy yntymaqtastyqtyń jańa kókjıegin ashatyn Qazaqstan astyǵyn ımporttaý baǵdarlamasynyń júzege asyrylýy da aıryqsha mánge ıe. Qasym-Jomart Toqaev beınesin baısaldy, biraq Erevandy da, Bakýdi de beıbitshilikke jeteleıtin qýatty kópir dep ataýǵa bolady. Onyń «bári jeńiske jete alady» degen kózqarasy búkil óńirde jańa ómir tynysyn ashqan formýlaǵa aınaldy. Armenııa men Qazaqstandy tarıhı, mádenı jáne ekonomıkalyq ortaqtastyq baılanystyryp, búginde Qasym-Jomart Toqaevtyń bastamalary men teńgerimdi saıasatynyń arqasynda jańa deńgeıge kóterildi. Degenmen, eń bastysy ol tipti kúrdeli geosaıası jaǵdaıda da beıbitshilik ıdeıasyn basshylyqqa ala otyryp, adamı jylylyq pen syndarly kózqarasty saqtaýǵa bolatyndyǵyn kórsetip berdi. Qasym-Jomart Toqaev úlgisi kóshbasshylar múddeleri arasyna syzat túsiretin emes, bizdiń aramyzda altyn kópir bolatyn adam ekenin dáleldeıdi, — dedi maqala avtory Mktrıch Israelıan.