Qazaqstan Premer-Mınıstri Oljas Bektenov Ashhabadtaǵy TMD úkimetteri basshylary keńesiniń otyrysyna qatysty
ASTANA. KAZINFORM - Qazaqstan Respýblıkasynyń Premer-Mınıstri Oljas Bektenov Túrikmenstanda ótken TMD úkimetteri basshylary keńesiniń kezekti otyrysyna qatysty.
Ashhabadta Oljas Bektenovti Túrikmenstan prezıdenti Serdar Berdimuhamedov qabyldady. QR Úkimetiniń basshysy Túrikmenstan prezıdentine Memleket basshysy Qasym-Jomart Toqaevtyń jyly lebizin jetkizdi. Áńgimelesý barysynda ózara qurmetke negizdelgen ekijaqty qarym-qatynastardyń joǵary deńgeıi atap ótildi. Eki el arasyndaǵy taýar aınalymy bir jylda 28%-ǵa artyp, $563 mln-dy quraǵan. Bıylǵy úsh aıdyń qorytyndysy boıynsha ózara saýda aınalymy $105 mln-ǵa jetti. Gaz salasyndaǵy yntymaqtastyq, sondaı-aq aýyl sharýashylyǵy salasyndaǵy birlesken qazaq-túrikmen jobalaryn iske asyrý máseleleri talqylandy.
TMD ÚBK otyrysynda Dostastyqtaǵy ózara is-qımyldyń ózekti máseleleri boıynsha jan-jaqty pikir almasý ótti. Kezdesý nátıjesinde túrli salalardaǵy ıntegratsııalyq baılanystardy odan ári damytýǵa jáne nyǵaıtýǵa baǵyttalǵan qujattar toptamasy qabyldandy.
Úkimetter basshylary ekonomıkalyq yntymaqtastyqtyń baǵyttaryn talqylady. Kólik, energetıka, hımııa ónerkásibi, ekologııa jáne qaýipti qaldyqtarmen jumys isteý, densaýlyq saqtaý, zııatkerlik menshik salasyndaǵy quqyq buzýshylyqtarǵa qarsy is-qımyl jáne basqa da salalardaǵy yntymaqtastyqty damytý boıynsha birqatar másele qaraldy.
Premer-Mınıstr Oljas Bektenov taýar nomenklatýrasy men logıstıkanyń tıimdiligin keńeıtý arqyly saýda baılanystaryn nyǵaıtý qajettigin atap ótti. Biregeı tetikterdiń, atap aıtqanda, erkin saýda aımaǵynyń jumys isteýi Dostastyqtyń ekonomıkalyq áleýetin arttyrýǵa múmkindik beredi. Qazaqstan Úkimetiniń basshysy TMD-nyń ınvestıtsııalyq ekojúıesin jaqsartý máselesine jeke toqtaldy.
TMD-daǵy kólik dálizderin damytýǵa erekshe nazar aýdaryldy. Qazirgi ýaqytta Qazaqstanǵa ákelingen ınvestıtsııanyń jalpy quny $35 mlrd-tan astam bolatyn tranzıttik transkontınentaldyq marshrýttar jelisi qalyptasty, bul Eýropa men Azııa arasyndaǵy qurlyqtyq tasymaldardyń 80%-nan astamyn el aýmaǵy arqyly júzege asyrýǵa múmkindik beredi. Oljas Bektenov tıimdi logıstıkalyq tizbekti qurý úshin tarıftik saıasatty úılestirý jáne kedendik rásimderdi tsıfrlandyrý boıynsha ózara is-qımyldy kúsheıtý qajettigin atap ótti. Sondaı-aq otyrys barysynda aýyl sharýashylyǵy salasynda jáne azyq-túlik qaýipsizdigin qamtamasyz etý máseleleri boıynsha ózara is-qımyldy jedeldetý sharalary qaraldy.
«Biz ekonomıkalyq turǵyda ózin-ózi qamtamasyz etýge qol jetkizýge, eldiń berik "ónerkásiptik negizin" qurýǵa, mańyzdy ınfraqurylymdy jańartýǵa, agroónerkásip keshenin qaıta júkteýge jáne Qazaqstannyń kólik-logıstıkalyq áleýetin tıimdi paıdalanýǵa múddelimiz. Atalǵan maqsattardy tolyqqandy iske asyrý úshin biz negizgi seriktesterimizben yntymaqtastyǵymyzdy nyǵaıtý mańyzdy ekenine senimdimiz», — dep atap ótti Premer-Mınıstr Oljas Bektenov.
Keńes qorytyndysy boıynsha yntymaqtastyqty odan ári damytýǵa yqpal etetin 11 qujatqa qol qoıyldy. TMD úkimetteri basshylary keńesiniń kelesi otyrysy 7-8 qarashada Reseıdiń Sochı qalasynda ótedi.
Otyrys aıasynda Qazaqstan Premer-Mınıstri Oljas Bektenov pen Qyrǵyzstan Mınıstrler Kabınetiniń tóraǵasy Aqylbek Japarov ekijaqty kezdesýi ótkizdi. Kún tártibinde Qyrǵyzstan Prezıdenti Sadyr Japarovtyń Qazaqstanǵa saparynyń qorytyndysy boıynsha saýda-ekonomıkalyq yntymaqtastyqty damytý jónindegi birlesken ýaǵdalastyqtardy iske asyrý máseleleri talqylandy. Úkimetter basshylary eki eldiń memleket basshylary qoıǵan taýar aınalymy kólemin $3 mlrd-qa deıin jetkizý jónindegi jańa mindetti oryndaý jónindegi jumysty tezdetýdi quptady.
