Qazaqstan Premer-lıgasyna joldama alǵan 3 komanda belgili boldy

ASTANA. KAZINFORM – Fýtboldan Qazaqstan Birinshi lıgasynyń bıylǵy maýsymy aıaqtaldy. Úsh komanda QPL-ge joldama aldy. 

Sheshýshi týrda óskemendik «Altaı» fýtbol klýby óz alańynda «Ońtústik» komandasyn 4:1 esebimen jeńip, keler jyly Qazaqstan Premer-lıgasynda oınaýǵa múmkindik aldy. 

Bir týr buryn «Kaspıı» komandasy Birinshi lıganyń chempıony bolsa, týrnırlik kestedegi ekinshi oryndy pavlodarlyq «Ertis» ıelendi. Osylaısha qos komanda joldama máselesin erterek sheship qoıǵan. 

«Túrkistan» komandasy qarjylyq jaǵdaıyna baılanysty sońǵy týr oıynynan bas tartty. Esesine «Shahter» avtomatty túrde 3 upaı aldy. Biraq óskemendik klýbtan eki upaıǵa artta qalǵan qaraǵandylyqtar bıylǵy mejeni oryndaı almaı, joldama máselesin keler jylǵa qaldyrdy.  

Budan buryn Qazaqstan Premer-lıgasynyń úzdik klýbtary «Astana» men «Qaırat» sońǵy týrda chempıondyqqa talasatynyn habarlaǵanbyz.