Qazaqstan Premer-lıgasy: Búgin fýtboldan el birinshiliginiń HHІІІ týry bastalady

ASTANA. KAZINFORM - Búgin fýtboldan Qazaqstan Premer-lıgasynyń HHІІІ týry bastalady. 

Bul týrdaǵy negizgi oıyndar 19 qazanda saǵat 18:00-de «Tobyl» (Qostanaı) men «Ordabasy» (Shymkent), 20 qazanda 16:00-de «Elimaı» (Semeı) men «Astana» arasynda bolady. Komandalar bıyl júldeli oryndarǵa qol jetkizýdi aldyna maqsat etip otyr. Sondyqtan jankúıerler atalǵan eki kezdesýden tartysty báseke kútedi.

Sondaı-aq atalǵan týrda 19 qazanda 14:00-de «Jeńis» (Astana) pen «Jetisý» (Taldyqorǵan), 16:00-de «Qaırat» (Almaty) pen «Turan» (Túrkistan) sheberlik baıqasady.

Al 20 qazanda 14:00-de «Qyzyljar» (Petropavl) men «Atyraý», 18:00-de «Qaısar» (Qyzylorda) men «Shahter» (Qaraǵandy) jasyl alańǵa shyǵady.

Aıta ketsek, fýtboldan birinshi lıgada «Oqjetpes» bir týr buryn Premer-lıgaǵa joldama aldy. Taǵy eki joldamaǵa Jezqazǵannyń «Ulytaý», Aqtaýdyń «Kaspıı» komandalary basty úmitker bolyp otyr.