Qazaqstan Premer-Lıgasy: «Tobyl» tórtinshi orynǵa kóterildi
ASTANA. QazAqparat - Qazaqstan Premer-Lıgasynyń 26-shy týry aıasynda pavlodarlyq «Ertis» óz alańynda qostanaılyq «Tobyldy» qabyldap, jeńiske jetti, dep habarlaıdy QazAqparat tilshisi.
Eki komanda da oıyndy jyldam bastady. Alań qonaqtarynyń eki qaptaly belsendi boldy. Dıdar Jalmuqan men Azdren Lýllaký kerekýlik qorǵaýshylardyń «qytyǵyna» tıdi. Oıyndaǵy birinshi qaýipti soqqyny Lýllaký jasady. Alaıda, qaqpashy Lorııa kerek jerden tabyldy. Osydan soń «Ertis» sapynan Fonseka men Kalının kózge tústi. Ekeýi kezek-kezek pas almasyp, aıyp alańyna birneshe ret endi. Birde «Tobyl» qorǵaýshylary saýatty qımyldasa, endi birde qaqpashy qyraǵylyq tanytty.
Taım aıaǵyna taman «Tobyl» fýtbolshylary gol soqty. Sol qaptaldaǵy qorǵaýshy Dmıtrıı Mıroshnıchenkonyń bergen pasyn Dıdar Jalmuqan kútip alyp, dopty aıyp alańyna asyrdy. Birinshi jetken Alekseı Şetkınge eshkim kedergi bolmady. 0:1!
Ekinshi taımda Robert Evdokımov shákirtteri qorǵanysqa mán bergendeı boldy. Komanda kapıtany Almır Mýhýtdınov pen Nıka Kvekveskırı qorǵaýshylarǵa jaqyn oınap, qarymta shabýyldarǵa ıek artty. Sonyń birinde Lýllaký esepti eseler edi. Alaıda, tájirıbeli legıonerge dáldik jetispedi.
Osydan soń «Ertis» komandasy nátıjeli shabýylmen jaýap qaıyrdy. Sol qaptaldan sytylyp shyqqan Rýslan Esimov «Tobyl» aıyp alańyna soqqy baǵyttady. Dop Nıka Kvekveskırıdiń aıaǵynan serpilip, qaqpaǵa endi. 1:1! Alańǵa qostanaılyq fýtbolshy Samat Jarynbetov qosyldy. Ol N.Jumasqalıevti almastyrdy. Al Egon Výh Azdren Lýllakýdyń ornyna shyqty.
Jańa oıynshylar jańa lep ákeldi. Egon Výh qarsylastardy aldap ótip, alǵa umtylǵan. Ony «Ertis» qorǵaýshysy shalyp jyqty. Al Nıka Kvekveskırı sol núkteden aıyp alańyna pas asyrdy. Dopqa birinshi jetken qorǵaýshy Fernander Kassaı qaqpa toryn búlk etkizdi. 1:2!
Osylaısha, «Tobyl» syrt alańda jeńiske jetip, týrnır kestesiniń tórtinshi satysyna kóterildi.
Batyr Jolaıuly
