Qazaqstan Premer-Lıgasy: «Tobyl» taǵy súrindi
QOSTANAI. QazAqparat - Qostanaılyq fýtbol klýby Almatyda «Qaırattan» utylyp qaldy, dep habarlaıdy QazAqparat tilshisi.
Oıynnyń alǵashqy mınýttarynan-aq, almatylyqtar basymdyqty ózderinde ustady. Nebári 4-shi mınýtta Andreı Arshavın sol qaptaldan sytylyp shyǵyp, aıyp alańyna pas usyndy. Kerek jerden tabylǵan Jerar Goý qatelespedi - 1:0.
Jyldam gol soǵyp alǵan alań ıeleri qarymta shabýyldarǵa ıek artyp, qorǵanysty myǵym ustaýǵa tyrysqan sekildi. «Tobyl» bapkeri jaraqat alyp qalǵan komanda kapıtany Almır Mýhýtdınovty almastyrdy. Onyń ornyna Nurbol Jumasqalıev shyqty. 30-mınýtta A.Arshavın «Tobyl» aıyp alańyna umtylǵan Isael Barbozany paspen tapty. Sońǵysy J.Goýǵa dop ysyrǵan. Jerar soqqan gol esepke alynbady. Qaptaldaǵy tóreshiniń pikirinshe, shabýylshy oıynnan tys qaldy.
«Tobyl» komandasy Azdren Lýllaký men Alekseı Şetkın uıymdastyrǵan shabýyldan soń eńse túzedi. Şetkın qaqpaǵa eki-úsh metr jerden qıys tepti. Munan soń Egon Výh belsendilik tanytty. Onyń asyrǵan dobyna birinshi jetken Fernander Kassaı baspen urdy. Taǵy la qıys soqqy.
Ekinshi taım basynda «Tobyl» esepti teńestiretin eki múmkindikti múlt jiberdi. Áýeli Nurbol Jumasqalıev urymtal tusqa shyqty. Onyń aınaldyra baǵyttaǵan soqqysy qaqpa baǵanasynan bıik ketse, qaqpashymen betpe-bet shyqqan Dıdar Jalmuqanǵa da dáldik jetispedi. Bas bapker Robert Evdokımov alańǵa Raýl Djalılovty jiberdi. Jas oıynshy komandasyna jańa lep bere qoıǵan joq. «Qaırattyń» sol qaptaldaǵy qorǵaýshysy Ǵ.Súıimbaev ony «tusap» ustady.
Oıynnyń aıaqtalýyna on mınýt qalǵanda «Tobyl» qaqpashysynyń qateligin paıdalanǵan «Qaırattyń» jartylaı qorǵaýshysy I.Barboza esepti eseledi. Ol osy maýsymdaǵy óziniń 8-shi golyn soǵyp otyr.
Toqsan mınýt ta túgesildi. Tóreshi qosqan qosymsha ýaqytta da qostanaılyqtar tablodaǵy kórsetkishke ózgeris engize almady. Osylaısha, «Tobyl» taǵy da 3 upaıdan qaǵyldy.
