Qazaqstan Premer-Lıgasy: «Tobyl» men «Astana» teń tarqasty
QOSTANAI. QazAqparat - Fýtboldan Qazaqstan chempıonatynyń 29-týrynda Qostanaıdyń "Tobyly" elordalyq "Astananyń" qabyldady. Oıyn 1:1 esebimen aıaqtaldy, dep habarlaıdy QazAqparat tilshisi.
Qos komanda oıyndy jyldam qarqynda bastady. Tipti, ekinshi mınýtta "Astana" shabýylshysy Roman Mýrtazaev soqqylar statıstıkasyn ashty. Onyń baǵyttaǵan soqqysyn "Tobyl" qaqpashysy qaıtaryp jiberdi. Іle-shala oryndalǵan buryshtama dobyna qostanaılyq qorǵaýshylar toıtarys berdi. Otyzynshy mınýt shamasynda tobyldyqtar tablodaǵy esepke ózgeris ákeldi. Aıyp alańyna asyrylǵan buryshtama dobynan soń dop Jasulan Moldaqaraevtyń aldyna dóp tústi. Al shabýylshy jaqyn tustan qatelesken joq. 1:0!
Astanalyqtar birden jaýap qaıyrdy. Eýrokýboktarda atoı salyp júrgen Dmıtrıı Shomko sheberliginiń arqasynda A.Jýlpa men M.Gýrmandy aldap ótip, alys buryshqa tepti. Qaqpashy D.Nepogodov dopty qaıtara almady. Esep teńesti. 
Ekinshi taım basynda astanalyq qorǵaýshylardyń qateligin paıdalanyp ketken Dıdar Jalmuqan esepti eseler edi. Degenmen, urymtal tusqa shyqqan ony Dmıtrıı Shomko shalyp jyqty. Artynsha bas tóreshi oǵan "sary qaǵaz" kórsetti. Jaraqat alyp qalǵan D.Shomko ornyn I.Maevskııge bosatty. Osylaısha, "Astana" bapkeri alańnyń orta shebine taǵy bir oıynshy qosty.
Kezekti shabýyldardyń birinde G.Sartakov birinshi goldyń avtory J.Moldaqaraevqa pas berdi. Bul joly elordalyq qorǵaýshylar shabýylǵa tosqaýyl bola aldy.
"Tobyl" sapyna Egon Výh qosyldy. Ol D.Jalmuqandy aýystyrdy. Tyń oıynshy E.Výh orta tustan dop qabyldap, qaqpashymen jeke dara shyqty. Alaıda, jartylaı qorǵaýshy ózinde bar múmkindikti paıdalana almady. Onyń tepken doby qaqpa baǵanynan qıys ketti. Tóreshi qosqan ýaqytta aıtarlyqtaı ózgeris bolǵan joq. Osylaısha, qos komanda teń tarqasty.
