Qazaqstan pravoslavtary Rojdestvo merekesinde bas qosty
Almatylyq pravoslavtar Voznesen shirkeýine jınalyp, qulshylyq jasady. Qudaıǵa madaq aıtý merekelik sharasy 6 qańtar saǵat 23-00-de bastalǵan bolatyn. Kóne ilimniń ósıeti boıynsha bul kúni 40 kúndik oraza aıaqtalyp, adam rýhynyń shattyqqa bólenetin sáti. Osyǵan baılanysty búgin, 7 qańtarda merekelik dastarhan jaıylyp, barlyq hramdarda qulshylyqtar atqaryldy.
«Barlyǵyńyzdy Hrıstostyń dúnıege kelgen kúnimen jáne jańa jylmen quttyqtaımyn. Vıflıeem juldyzy bizdiń júregimizdi tazartyp, Hrıstostyń jolymen júrýge qýat pen járdem bersin. Qudaı bizdiń rýhymyz ben tánimizge kúsh-qýat berip, óziniń meıirim shapaǵatyn tóksin. Biz rojdestvo kúnderi eń mańyzdy másele - tynyshtyq pen beıbitshilikti tileımiz. Tynyshtyq ár shańyraqta, aǵaıyn-týys arasynda, túrli nanym-senimdegi adamdar men ulttar arasynda bolsyn», - dedi Qazaqstan jáne Astana mıtropolıti Aleksandr.
Aıta keteıik, 2018 jyly Qazaqstan pravoslavtary qasıetti Vernen Pımeniniń azappan óltirilgenine 100 jyl tolǵanyn atap ótedi. Vernen Pımeni HH ǵasyrdyń basynda Qazaqstan jerindegi pravoslavıe úshin jan bergen alǵashqy qasiret shegýshi. Sonymen qatar, bıyl Qazaqstan mıtropolıt okrýgynyń qurylǵanyna 15 jyl, Iosıf mıtropolıttiń týǵanyna 125 jyl tolǵany atalyp ótilmek.
