«Qazaqstan» poıyzymen Astana-Máskeý arasynda qatynaý jaqsardy
ASTANA. Shildeniń 1-i. QazAqparat - Búgin Astana temirjol vokzalynan jańartylǵan, jaılylyǵy jáne qyzmet kórsetý deńgeıi joǵary «Astana-Máskeý» baǵytymen qatynaıtyn №71/72 «Qazaqstan» jolaýshylar poıyzynyń ekinshi quramy jóneltildi. Bul aqparatty «Jolaýshylar tasymaly» AQ-nyń baspasóz qyzmeti taratyp otyr.
Kompanııanyń habarlaýynsha, halyqaralyq baǵyttaǵy jolaýshylar poıyzynyń úshinshi quramy 2010 jylǵy shildeniń 5-inen bastap qatynaıtyn bolady. Atalǵan baǵyttaǵy alǵashqy quram aǵymdaǵy jyly maýsymnyń 9-ynan jolaýshylardy tasymaldaýdy bastap ketken bolatyn. Osylaısha, «Qazaqstan temir joly» ulttyq kompanııasy» AQ-nyń enshiles kásiporny «Jolaýshylar tasymaly» AQ-y Qazaqstan men Reseı astanalarynyń arasynda qatynaıtyn jolaýshylar poıyzdarynyń barlyq quramyn tolyǵymen jańartyp, jetildiretin bolady.
«Jyljymaly quramdy jańartý vagondardy qalpyna keltirip, kúrdeli jóndeý arqyly iske asyryldy. Zamanaýı vagondar barlyq halyqaralyq talaptarǵa sáıkes keledi jáne ár jolaýshynyń qajettiligin qanaǵattandyrady. Ásirese vagondardyń syrtqy jáne ishki dızaınyn zamanaýı materıaldar qoldanyp jasaýǵa, kadrlardy irikteýge erekshe kóńil bólindi», delingen baspasóz habarlamasynda.
Vagondardyń árbir kýpesinde jaıly ınterer men yńǵaıly dıvandardan basqa radıo jáne DVD-ǵa qosylǵan teledıdar ornatylǵan. Jolaýshylardyń bos ýaqytyna jáne turmystyq qyzmet kórsetýge basa nazar aýdarylǵan. Poıyzda olarǵa túrli ústel oıyndary, shaǵyn kitaphana, tigin jáne tazalyq jınaqtary usynylady.
«Jolaýshylar tasymaly» AQ-y aǵymdaǵy jyly «Almaty-Máskeý» baǵytymen qatynaıtyn №7/8 poıyz vagondaryn tolyǵymen jańartpaq.
