Qazaqstan poıyzdarynda jolaýshylarǵa arnalǵan qandaı servıster bar
ASTANA. KAZINFORM – «Jolaýshylar tasymaly» AQ jolaýshylarǵa kórsetiletin qyzmettiń sapasy men qolaılylyǵyn arttyrýǵa baǵyttalǵan tsıfrlyq jáne servıstik sheshimderdi júıeli túrde damytyp keledi. Búgin ulttyq tasymaldaýshy jolaýshylar kúndelikti paıdalanatyn eń suranysqa ıe TOP-7 servısti usynady.
Poıyz qozǵalysynyń onlaın-tablosy
Onlaın-tablo arqyly jolaýshylar poıyzdardyń qozǵalysyn naqty ýaqyt rejıminde baqylap otyra alady. Munda poıyzdyń kestesi, ornalasqan jeri, kelý jáne júrý ýaqyty, sondaı-aq, múmkin bolatyn keshýgiler týraly aqparat qoljetimdi. Bul servıs jolaýshylarǵa saparyn tıimdi josparlaýǵa múmkindik beredi.
Bılet satyp alý saıty
Temirjol bıletterin onlaın satyp alýǵa arnalǵan kompanııanyń resmı saıty. Qyzmet táýlik boıy, komıssııasyz jumys isteıdi. Jolaýshylar baǵytty, qyzmet kórsetý klasyn tańdap, bıletti yńǵaıly tásilmen tólep, elektrondy jol júrý qujatyn ala alady. Saıtty paıdalaný kassaǵa barý qajettiligin joıyp, ýaqytty únemdeıdi.
«Jolaýshylar tasymaly» AQ-nyń resmı saıty
Temirzholy.kz resmı saıtynda jolaýshylarǵa qajetti barlyq negizgi aqparat bir jerge jınaqtalǵan. Munda temirjol tasymaly, servıster, tarıfter men sapar erejeleri týraly ózekti málimetterdi jedel alýǵa, sondaı-aq «Jolaýshylar tasymaly» AQ qyzmetimen tolyǵyraq tanysýǵa bolady.
Biryńǵaı baılanys ortalyǵy — 1433
Biryńǵaı tegin baılanys ortalyǵy jolaýshylarǵa temirjol tasymalyna qatysty barlyq suraqtar boıynsha keńes beredi. Ortalyq mamandary poıyz kestesin naqtylaý, bagajdy tasymaldaý erejeleri, bıletterdi qaıtarý tártibi jáne ózge de qyzmet kórsetý máseleleri boıynsha jedel jaýap usynady.
Shaǵymdar men usynystarǵa arnalǵan WhatsApp — +7 776 714 5686
Qyzmet sapasyn arttyrý jáne jolaýshylarmen tikeleı keri baılanys ornatý maqsatynda WhatsApp-chaty jumys isteıdi. Jolaýshylar óz shaǵymyn, usynysyn nemese pikirin joldaı alady. Sonymen qatar poıyzdarda QR-kodtar ornalastyrylǵan, olardy skanerleý arqyly jolaýshylar WhatsApp-chatqa tikeleı ótip, habarlama qaldyra alady.
Bul servıs ótinishterge jedel áreket etýge jáne jolaýshylar pikirin qyzmetti jetildirý barysynda eskerýge múmkindik beredi.
Darmen — jol jaǵdaıy men aýa raıyn baqylaý júıesi
Darmen qosymshasy jol jaǵdaıy men meteorologııalyq ahýaldy baqylaýǵa kómektesedi. Servıs sapardy josparlaý kezinde aýa raıy faktorlary men jol jaǵdaıyn eskerýge múmkindik berip, sapardyń qaýipsizdigi men jaılylyǵyn arttyrady.
Aıta keteıik, bıyl jazda Alakólge qosymsha 9 poıyz qatynaıdy.