Qazaqstan poıyzdarynda Starlink ınterneti iske qosyldy: qandaı qyzmetter tegin bolady
ASTANA. KAZINFORM – Qazaqstanda 51 baǵyt boıynsha qatynaıtyn jolaýshylar poıyzdary Starlink spýtnıktik ınternetine qosyldy. Endi jolaýshylar jol ústinde ınternettiń birqatar qyzmetin tegin paıdalana alady. Bul týraly «Jolaýshylar tasymaly» AQ basqarma tóraǵasy Ánýar Ahmetjanov jobanyń tanystyrylymynda málimdedi.
«Qazaqstan temir joly» ulttyq kompanııasynyń málimetinshe, joba 108 poıyz quramyndaǵy 1500-den astam vagondy qamtıdy. Sonyń nátıjesinde jyl saıyn 11 mıllıonnan astam jolaýshy poıyzda ınternet pen tsıfrlyq qyzmetterdi paıdalana alady.
Jolaýshylarǵa ınternettiń tegin jáne aqyly paketteri usynylady. Tegin paket arqyly messendjerlerde mátindik habarlama almasýǵa bolady. Al fotosýretter men beınelerdi jiberý, daýystyq habarlamalar jáne ınternettiń basqa múmkindikterin paıdalaný úshin aqyly paketke qosylý qajet.
Ánýar Ahmetjanovtyń aıtýynsha, spýtnıktik ınternetti engizýdegi basty maqsat – poıyz jolaýshylarynyń jol boıy baılanysta bolýyna jaǵdaı jasaý.
– Elimizdiń aýmaǵy keń ekenin bárimiz bilemiz. Poıyzdarymyz myńdaǵan shaqyrym jol júrip, halyq sırek qonystanǵan, mobıldi baılanys múlde joq nemese nashar ustaıtyn aýmaqtardan ótedi. Búginde biz osy máseleniń jańa sheshimin usynyp otyrmyz. Ol – spýtnıktik ınternet. Endi jolaýshylar jol boıy jaqyndarymen baılanysyp, jumys máselelerin sheship, memlekettik jáne bank qyzmetterin paıdalana alady, – dedi basqarma tóraǵasy.
Onyń sózinshe, kompanııa bul tehnologııany birden engizgen joq. Spýtnıktik ınternet alǵash ret 2024 jyldyń qańtarynda Óskemen jáne Almaty baǵytyndaǵy poıyzdarda synaqtan ótken. Ol kezde OneWeb júıesi paıdalanylsa, qazir Starlink tehnologııasy qoldanylyp otyr.
– Biz baılanys sapasyn, onyń turaqtylyǵyn jáne bir mezgilde qansha adamnyń ınternetke qosyla alatynyn tekserdik. Júıeniń poıyzdarda tıimdi jumys isteıtinine kóz jetkizgennen keıin ǵana ony keńinen engizýge kiristik, – dedi Ánýar Ahmetjanov.
Sonymen qatar ol spýtnıktik ınternettiń sapasyna aýa raıy áser etýi múmkin ekenin eskertti. Atap aıtqanda, boran jáne basqa da qolaısyz jaǵdaılarda baılanys jyldamdyǵy tómendeýi nemese ýaqytsha úzilýi yqtımal.
Kompanııa aldaǵy ýaqytta ınternet arqyly jolaýshylarǵa usynylatyn qyzmet túrlerin keńeıtýdi josparlap otyr. Máselen, poıyzda otyryp tamaqqa tapsyrys berý, vokzalǵa aldyn ala taksı shaqyrý, qajetti fılmder men basqa da beınematerıaldardy kórý múmkindikteri qarastyrylǵan.
– Internet biz úshin túpki maqsat emes. Bul – jańa qosymsha qyzmetterdi damytýdyń negizi. Turaqty tsıfrlyq baılanystyń paıda bolýy buryn bolmaǵan múmkindikterge jol ashady, – dedi Ánýar Ahmetjanov.
Aıta keteıik, bıylǵy toǵyz aıda ulttyq tasymaldaýshy 9 mıllıon jolaýshy tasymaldaǵan. Jyl sońyna deıin bul kórsetkish 13 mıllıonnan asady dep josparlanǵan.
Buǵan deıin Kazinform agenttigi «Poıyzdar men ushaqtardy ınternetpen qamtamasyz etý qarqyny qalaı?» degen materıalynda elimizdegi temirjol jáne áýe kólikterin ınternetke qosý jumystary týraly jazǵan bolatyn.
