Qazaqstan portynda sheteldik 4 kemeniń jumysy toqtatyldy

ASTANA. QazAqparat - 6-14 mamyr aralyǵynda Aqtaý jáne Baýtıno teńiz portynyń ákimshilikteri qurǵaq júk kemelerin paıdalaný qaýipsizdigin qamtamasyz etýge baǵyttalǵan aýqymdy tekseris júrgizdi, dep habarlaıdy QazAqparat.

QR Investıtsııalar jáne damý mınıstrligi baspasóz qyzmetiniń málimetinshe, tekserý barasynda Qazaqstan, Reseı, Ázerbaıjan jáne Iran elderiniń 53 qurǵaq júk tasıtyn kemesi qaralǵan. 

Onyń nátıjesinde anyqtalǵan aqaýlardy joıǵanǵa deıin 4 kemeniń, ıaǵnı, Irannyń 3 kemesi men Reseıdiń 1 kemesiniń jumysy toqtatyldy. 

Negizgi aqaýlar men talaptardyń oryndalmaýyna mynalar jatqyzyldy: Navıgatsııalyq, órtke qarsy quraldardyń, radıo quraldarynyń aqaýlary, júk trıými esikteri sý ótkizip qoıýy, keme ornyqtylyǵyna qoıylatyn talaptardyń saqtalmaýy, keme men jabdyqtardyń korrozııasy, keme jýrnaldarynyń halyqaralyq konventsııalar talaptaryna saı bolmaýy, ekıpaj dıplomdary men kýálikteriniń laýazymdaryna saı bolmaýy.

Sonymen birge, Irannyń 5 kemesine porttan ketkenge deıin eskertýlerdi joıýǵa nusqaý berildi. Eskertýler ekıpaj quramynyń quzyretine qatysty boldy. 

Aqtaý porty men Baýtıno teńiz ákimshiligi osy elderdiń teńiz porty bıligine halyqaralyq keme júzý qaýipsizdigine qoıylatyn talaptarǵa saı kelmeıtin kemelerdi jibermeý jóninde sharalar qabyldaý týraly hat joldaıdy.