Qazaqstan porttary arqyly júk kólemi 10 mln tonnaǵa jetkiziledi - mınıstr
Konventsııa Halyqaralyq teńiz uıymynyń bastamasymen qabyldanǵan jáne Konventsııaǵa 53 memleket qosyldy.
Konventsııanyń negizgi maqsaty - sýǵa batqan kemelerdi tez ári tıimdi alyp shyǵary, apat saldaryn joıýdyń biryńǵaı qaǵıdalary men rásimderin engizý.
«Konventsııada teńiz apaty kezinde bolǵan zalaldy qarjylaı óteýdi kepildendirý boıynsha keme ıesiniń jáne júzgende týy kóterilgen memlekettiń mindetteri bekitilgen. Qujatty ratıfıkatsııalaý qajettiligi Kaspıı teńizinde keme qatynasynyń artýyna baılanysty týyndap otyr. Bul rette, Qazaqstan - negizgi júk quraýshy memleket. Kaspıı teńizinde jalpy júktiń 31 paıyzy Aqtaý jáne Quryq porttarynda tıeledi. Sonymen qatar, 2020 jyly Irannyń Kaspıı jaǵalaýyndaǵy porttarymen jańa avtomobıl-parom qatynasy ashyldy jáne turaqty konteınerlik jeli iske qosyldy», - dedi QR Indýstrııa jáne ınfraqurylymdyq damý mınıstri Beıbit Atamqulov.
Osy oraıda ol elimiz Transkaspıı halyqaralyq kólik dálizin belsendi túrde damytyp otyrǵanyn atap ótti. Jalpy alǵanda, 2025 jylǵa qaraı Qazaqstannyń porttary arqyly júk kólemin 10 mln tonnaǵa deıin (2020 jyly – 5,4 mln tonna) jetkizý josparlanyp otyr.
«Osy jaǵdaıda porttarǵa kiretin kemeler sany eki esege ulǵaıady. Tıisinshe teńiz apattarynyń bolý táýekeli artady. Konventsııany ratıfıkatsııalaý teńiz apattary bolǵan kezde Qazaqstannyń múddelerin qorǵaý úshin qajetti jaǵdaılar jasaıdy. Birinshiden, elimizdiń sýlaryna kiretin keme ıeleriniń óz jaýapkershiligin saqtandyrý nemese sýǵa batqan kemeni alyp shyǵarý mindetin belgileıdi. Bul Qazaqstanǵa kemeni kóterý shyǵyndaryn óteýdi tikeleı saqtandyrý kompanııasynan talap etýge múmkindik beredi. Ekinshiden, týyn kóterip júzetin memlekettiń teńiz ákimshiliginen kemeni kóterý jáne apat saldaryn joıý mindetterin oryndaýdy saqtandyrý týraly kýálik túrinde kepildik alady. Úshinshiden, teńiz apaty bolǵan jaǵdaıda Qazaqstannyń teńiz ákimshiliginiń, keme ıesiniń jáne sheteldik kemeniń teńiz ákimshiliginiń is-qımyl tártibin anyqtaıdy. Konventsııany ratıfıkatsııalaý qosymsha bıýdjet qarajatyn qajet etpeıdi», - dedi B. Atamqulov.