Qazaqstan polıtsııasyna 20 myńnan astam qyzmetker jetispeıdi
ASTANA. KAZINFORM — Qazaqstanda jergilikti ákimshilik polıtsııa bólimshelerinde 20 myńnan astam qyzmetker jetispeıdi. Onyń ishinde patrýldik polıtsııaǵa keminde 10 myń maman qajet. Bul týraly Іshki ister mınıstriniń orynbasary Igor Lepeha málimdedi.
Onyń aıtýynsha, ýchaskelik polıtsııa ınspektorlary men kámeletke tolmaǵandar isi jónindegi ınspektorlar arasynda da kadr tapshylyǵy bar.
— Qazir patrýldik polıtsııa, ýchaskelik ınspektorlar, kámeletke tolmaǵandar isi jónindegi ınspektorlar jetispeıtini eshkimge qupııa emes. Patrýldik polıtsııaǵa keminde taǵy 10 myń adam qajet. Óıtkeni olar qoǵamdyq tártipti saqtaýmen qatar, jol qaýipsizdigin qamtamasyz etedi jáne qala syrtyndaǵy joldarda qyzmet atqarady, — dedi Igor Lepeha Úkimettegi brıfıngte.
Vıtse-mınıstr kadrǵa degen qajettilik jańa shaǵynaýdandardyń, eldi mekender men mektepterdiń paıda bolýyna baılanysty artyp otyrǵanyn jetkizdi.
— Bul bólimshelerdiń barlyǵy jergilikti bıýdjet esebinen qarjylandyrylady. Qazir ákimdermen jumys istep jatyrmyz. Bıýdjettiń múmkindigine qaraı, eń aldymen osy bólimshelerdegi qyzmetkerler sanyn kezeń-kezeńimen kóbeıtý máselesin qarastyryp jatyrmyz. Prezıdent Ákimshiliginiń maquldaýy men Úkimettiń qoldaýy bolsa, keler jyldan bastap bul bólimshelerdiń shtat sanyn kezeń-kezeńimen arttyramyz dep úmittenemiz, — dedi ol.
Sonymen birge, Igor Lepeha patrýldik polıtsııaǵa qajet 10 myń qyzmetker jalpy qajettiliktiń bir bóligi ǵana ekenin aıtty.
— Biz aıtyp otyrǵan máselelermen aınalysatyn jergilikti ákimshilik polıtsııa qyzmetkerleriniń ózine 20 myńnan astam adam jetispeıdi, — dep naqtylady ІІM basshysynyń orynbasary.
Aıta keteıik, elimizde jol apaty kóp bolatyn jerlerge medıtsınalyq-qutqarý beketteri jaqyndatylady.
Kólik júrgizý quqyǵynan aıyrylǵandar taksıde qyzmet ete almaıdy.
Sondaı-aq jańadan kólik júrgize bastaǵan azamattardy daıarlaý sapasyna talap kúsheıtiledi.
