Qazaqstan polıtsııasy ShYU-ǵa múshe memleketter úshin 345 qylmyskerdi taýyp, ustady
ASTANA. KAZINFORM – Bishkek qalasynda Shanhaı yntymaqtastyq uıymyna múshe memleketterdiń Іshki ister jáne qoǵamdyq qaýipsizdik mınıstrleriniń kezekti keńesi ótti, - dep jazdy Polisia.kz.
Іs-sharaǵa ShYU elderiniń quqyq qorǵaý organdarynyń basshylary, Interpol Bas hatshylyǵynyń, ShYU hatshylyǵynyń jáne TMD-nyń Uıymdasqan qylmysqa qarsy kúres jónindegi bıýrosynyń ókilderi qatysty.
Keńes aıasynda Qyrǵyz Respýblıkasynyń Prezıdenti Sadyr Japarov delegatsııa basshylaryn, sondaı-aq halyqaralyq jáne óńirlik uıymdardyń ókilderin qabyldady. Kezdesý barysynda óńirlik qaýipsizdikti nyǵaıtý, zamanaýı syn-qaterlerge qarsy is-qımyl jáne halyqaralyq polıtsııa yntymaqtastyǵyn odan ári damytý máseleleri talqylandy. Qazaqstan delegatsııasyn Qazaqstan Respýblıkasynyń Іshki ister mınıstri Erjan Sadenov basqardy.
Otyrystyń negizgi taqyryby transulttyq uıymdasqan qylmysqa, esirtkiniń zańsyz aınalymyna, ekstremızmge, terrorızmge jáne kıberqylmysqa qarsy kúreste quqyq qorǵaý organdary arasyndaǵy praktıkalyq ózara is-qımyldy kúsheıtý boldy. Zamanaýı tsıfrlyq tehnologııalar men jasandy ıntellektini paıdalaný arqyly jasalatyn qylmystardyń aldyn alý máselesine erekshe nazar aýdaryldy.
- Bıyl ShYU-ǵa múshe memleketter úshin Qazaqstan polıtsııasy 345 qylmyskerdi izdep taýyp, ustady. ShYU elderiniń aýmaǵynda bizdiń elimiz úshin izdeýde júrgen 49 adam anyqtaldy. Sonymen qatar quqyqtyq kómek kórsetý jónindegi 366 suraý jedel túrde oryndaldy. Budan bólek, esirtki óndirýmen jáne ótkizýmen aınalysqan úsh transulttyq uıymdasqan qylmystyq toptyń qyzmeti toqtatyldy, - dep atap ótti QR ІІM basshysy Erjan Sadenov.
Keńeske qatysýshylar qazirgi zamanǵy qaýipterge qarsy kúrestiń tıimdiligi jedel aqparat almasýǵa, birlesken is-qımyldy úılestirýge jáne quqyq qorǵaý organdarynyń qyzmetine zamanaýı tehnologııalardy belsendi engizýge tikeleı baılanysty ekenin atap ótti.
Otyrystyń qorytyndysy boıynsha yntymaqtastyqty odan ári damytýǵa, birlesken operatsııalar ótkizýge, tájirıbe almasýǵa jáne ShYU-ǵa múshe memleketterdiń quzyretti organdary arasyndaǵy ózara is-qımyldy nyǵaıtýǵa baǵyttalǵan Hattamaǵa qol qoıyldy.
Іs-shara aıasynda Erjan Sadenov Pákistannyń ishki ister mınıstri Mohsın Nakvı jáne Úndistannyń memlekettik ishki ister mınıstri Nıtıananda Raımen ekijaqty kezdesýler ótkizdi. Kelissózder barysynda ekijaqty yntymaqtastyqtyń ózekti máseleleri men ony odan ári damytý perspektıvalary talqylandy.
Búginde Shanhaı yntymaqtastyq uıymy óńirdegi quqyq qorǵaý organdarynyń kúsh-jigerin úılestiretin negizgi halyqaralyq alańdardyń biri bolyp qala beredi. Qatysýshy memleketter arasyndaǵy praktıkalyq yntymaqtastyqty damytý transulttyq qylmysqa qarsy kúrestiń tıimdiligin arttyrýǵa jáne Shanhaı yntymaqtastyq uıymy keńistigindegi qaýipsizdikti nyǵaıtýǵa yqpal etedi.
Aıta keteıik, polıtsııa jasóspirimderdi «drop» bolýdan saqtanýǵa shaqyrdy.
