Qazaqstan polıetılen paketterden qashan bas tartady

ASTANA. QazAqparat - Qazaqstan birtindep bir rettik polıetılen paketterden bas tartýy múmkin, dep habarlaıdy «QazAqparat» HAA tilshisi QR Investıtsııalar jáne damý mınıstri Jeńis Qasymbektiń elektrondy Úkimet portalyndaǵy blogyna silteme jasap.

Sarjan Saıat esimdi portal qoldanýshysy «damyǵan elderdiń tájirıbesine súıenip, polıetılen paketterden nege bas tartpaımyz» dep mınıstrge suraq qoıǵan.

Jeńis Qasymbektiń aıtýynsha, búginde el naryǵynda polımerlik qamtama óndirisimen aınalysatyn 50-den asa kompanııa bar eken. Olardyń kóbi Astana, Almaty, Pavlodar, Qaraǵandy, Qostanaı, Aqtóbe, Shymkent qalalarynda.

«Qazir, Investıtsııalar jáne damý mınıstrligi polıetılendi shekteý nemese oǵan tyıym salý máselesin jan-jaqty zertteý ústinde. Oǵan kóshýdi birneshe kezeń arqyly iske asyrǵan durys.

1 kezeń - polıetılen paketterdiń tegin berilýine tyıym salý. 2 kezeń - polıetılen paketterdiń satylýyna tyıym salý. Usynysty  «Atameken» QR UKP men  «KazWaste» mekemesiniń qaraýyna jiberdik», - dep jaýap berdi Jeńis Qasymbek.

Mınıstr sondaı aq, eldegi turmystyq qaldyqtarmen aınalysatyn «KazWaste» mekemesiniń joǵaryda aıtylǵan birinshi kezeńdi qoldaıtynyn, al ekinshisimen olardyń  kelispeıtinin aıtty. Sebebi Qazaqstanda polıetılen paketter azyq-túliktiń gıgıenalyq talaptaryn saqtap tur, oǵan qosa polıetılen óndirisiniń arqasynda qanshama qazaqstandyq jumyspen qamtylǵan.

«Atameken» kásipkerler palatasy da «KazWaste» keltirgen pikirmen sanasqan, sebebi atalǵan norma kásipkerlik shekteýmen qatar jumyssyz adamdar sanyn kóbeıtedi jáne bıýdjette túsetin salyq mólsherin kemitedi.