Qazaqstan polıtsııasynyń úzdik mergeni anyqtaldy
QOSTANAI. QazAqparat - Qostanaı oblystyq Іshki ister departamentiniń polıtsııa maıory Batyrbek Zákirıanov praktıkalyq oq atýdan aýyspaly kýboktyń ıegeri atandy, dep habarlaıdy QazAqparat tilshisi atalmysh vedomstvonyń baspasóz qyzmetine silteme jasap.
Qostanaı oblystyq ІІD Jedel áreket etý arnaıy jasaǵynyń (SOBR) komandır orynbasary Batyrbek Zákirıanov Іshki ister mınıstrliginiń 29 qyzmetkeri qatysqan jarysta jeńiske jetti. Ol arnaıy jattyǵýdy Makarov tapanshasynan 8,6 sekýndta aıaqtady. Nátıjesinde, barlyǵy 30 upaıdyń 28-in qorjynǵa basty.
Mergender básekesi Astana qalasy mańyndaǵy Aqmol aýylynda oqý-ádistemelik jıyndar sheńberinde ótti.
Qostanaılyq ofıtserdiń praktıkalyq oq atý boıynsha biliktiligi joǵary ekenin aıta ketý kerek. Ol ІІD-de jas sarbazdardy qarýdan atýǵa úıretedi.
«Qarý ustaýǵa bala kezden qyzyqtym. Al praktıkalyq oq atýǵa arnaıy jasaq quramyna kelgen ýaqytta kiristim. 2012 jyly reseılik áriptestermen tájirıbe almastyq. Keıin ózimizdiń jasaqtaǵylardy oq atýǵa úırete bastadym. Qazirgi kezde nusqaýshy qyzmetin atqaramyn», - dedi Zákirıanov.
