Qazaqstan polıtsııasy Ózbekstanda memleketaralyq izdeýde bolǵan Tájikstan azamatyn ustady
ASTANA. QazAqparat - Qazaqstandyq polıtsııa qyzmetkerleri Ózbekstan aýmaǵynan 10 jyl boıy memleketaralyq izdeýde bolǵan Tájikstan azamatyn ustady. Bul týraly QR ІІM resmı ókili Almas Sadýbaev aıtty, habarlaıdy QazAqparat tilshisi.
«Túrkistan oblystyq polıtsııa departamentiniń krımınaldyq polıtsııa qyzmetkerleri adam óltirgeni úshin memleketaralyq izdeýde bolǵan Tájikstan Respýblıkasynyń azamatyn izdeý jáne ustaý boıynsha operatsııany sátti aıaqtady. Ol 10 jylǵa jýyq boıy sot ádildiginen jaltaryp júrgen», - dedi Almas Sadýbaev.
Onyń aıtýynsha, qazaqstandyq polıtsııaǵa qylmyskerdiń jasyrynǵan jeri týraly aqparat ózbek áriptesterinen kelip túsken.
«Eki memleket polıtsııasynyń osyndaı tyǵyz yntymaqtastyǵynyń nátıjesinde ol Ózbekstan Respýblıkasynyń Tashkent aýmaǵynda ustaldy. Endi ádil jazasyn alady», - dedi resmı ókil.
