Qazaqstan polıtseıleri jastardy sportqa baýlýda
TALDYQORǴAN. QazAqparat - Qazaqstan polıtsııasynyń 25 jyldyǵyna oraı fýtboldan týrnır ótti.
Jarysqa 7-11 synyp oqýshylarynan jáne jergilikti kolledj stýdentterinen quralǵan 6 komanda qatysty, dep habarlaıdy QazAqparat tilshisi.
Almaty oblysy ІІD bastyǵy, polıtsııa general-maıory Murat Urumhanovtyń bastamasymen ótken týrnırdiń maqsaty - jasóspirimderdi sportqa baýlý, bos ýaqytty tıimdi paıdalanýǵa úıretý jáne polıtsııa qyzmetin nasıhattaý.
Atalǵan týrnır barysynda jergilikti «Jetisý» fýtbol klýbynyń oıynshylary sheberlik sabaǵyn ótkizip, qatysýshylarǵa sáttilik tiledi.
Jarty kúnge sozylǵan tartysty týrnırde júldeli úshinshi oryn alǵan Polıtehnıkalyq kolledjdiń «Barys» komandasynyń oıynshylary departament atynan fırmalyq fýtbol kıimderimen jáne arnaıy gramotamen marapattaldy. Ekinshi oryn alǵan Polıtehnıkalyq kolledjdiń «Suńqar» komandasyna bylǵary dop pen gramota tabystaldy. Al birinshi oryndy ıelengen №25 mekteptiń «Qyran» komandasynyń fýtbolshylary fırmalyq fýtbol kıimderin, bylǵary dop pen gramota aldy.
Barlyq júldeger komandalarǵa kýboktar tabystaldy. Sondaı-aq, týrnır nátıjesinde «Úzdik qorǵaýshy», «Úzdik shabýylshy», «Úzdik qaqpashy» nomınatsııalary boıynsha gramotalar men syılyqtar berildi. Sonymen qatar, árbir qatysýshyǵa «Qazaqstan polıtsııasyna 25 jyl» logotıpi bar arnaıy ázirlengen fýtbolkalar taratyldy.
Sońynda oıynshylardyń qatysýymen áıgili «Mannequin challenge» flesh-moby túsirilip, oqýshylar polıtsııa qyzmetkerlerin kásibı merekelerimen quttyqtady.
