Qazaqstan polıtseıleri ýkraınalyq áriptestermen tikeleı baılanysatyn bolady - zań

«Qazaqstan men Ýkraına arasyndaǵy qylmystyq ister boıynsha quqyqtyq kómek týraly shartty ratıfıkatsııalaýdy usynyp otyrmyz. Shartqa 2018 jyldyń 29 qazanynda qol qoıylǵan. Jalpy, qazir eki el arasyndaǵy qylmystyq ister boıynsha quqyqtyq kómek 1993 jylǵy Mınsk konventsııasy boıynsha júzege asyrylýda. Sodan beri shırek ǵasyr ótti. Kóp nárse ózgerdi. Ásirese zańnamaǵa eleýli ózgerister jasaldy. Jańa tergeý amaldary paıda boldy. Mundaı protsess Ýkraınada da bar. Eskerte keterligi, konventsııa men usynylyp otyrǵan shart arasynda eshqandaı qaıshylyq joq. Kerisinshe olar bir-birin tolyqtyrady, biraz normany naqtylaıdy», - dedi atalǵan qujat týraly baıandama jasaǵan QR Bas prokýrordyń orynbasary Marat Ahmetjanov.

Osy rette ol usynylyp otyrǵan shartqa toqtaldy.

«Bul shart qylmystyq ister boıynsha quqyqtyq kómek berý máselesin retteıdi. Eki eldiń quzyrly organdaryna kúdikti men aıyptalýshynyń kinásin dáleldeý boıynsha keshendi tergeý amaldaryn qamtıdy. Árıne, shart úlgilik negizde jasalǵan. Mundaı ekijaqty shart 27 elmen bar. Degenmen, bul kelisimniń birqatar ereksheligin aıtar bolsaq, aldymen qujat quqyq qorǵaý organdarynyń ýkraınalyq áriptestermen tikeleı baılanys jasaýǵa múmkindik beredi. Bul eki jaq úshin de mańyzdy norma jáne qylmyspen kúres baǵytynda ózara senimdi bildiredi. Odan basqa tergeý jumysynyń jedeldigin arttyrady. Birqatar quzyrly organ arasynda mundaı tikeleı baılanys adam quqyqtaryna qatysty bolmaýy tıis. Sebebi bul másele prokýratýra organdarynyń quziretine jatady», - dedi ol.

Onyń atap ótýinshe, taǵy bir erekshelik shart boıynsha qajet jaǵdaıda birlesken tergeý toptaryn qurýǵa bolady.

«Shartty ratıfıkatsııalaý ekonomıkalyq-áleýmettik jáne saıası keri áser etpeıdi. Ony iske asyrý bıýdjetten qosymsha qarjy talap etpeıdi»», - dedi Marat Ahmetjanov.

Májilis depýtattary atalǵan qujatty talqylaýdan keıin maquldap, Senat qaraýyna jiberý týraly sheshim qabyldady.