Qazaqstan polıtseıleri Elbasy Joldaýyna qoldaý kórsetti
«Búgin Elbasymyz N.Á. Nazarbaevtyń Qazaqstan halqyna Joldaýyn tyńdadyq. Ásirese, Joldaýdaǵy «... Azamattar sanasynda polıtseıler jazalaýshy emes, kerisinshe, qıyn jaǵdaıda kómek kórsetýshi degen túsinik ornyǵýy kerek. Polıtseıler - halyq arasyndaǵy meniń ókilderim» degen sózi júregime óte jaqyn tıdi. Bul bizge, ıaǵnı, tártip saqshylaryna úlken jaýapkershilik júkteıdi. Nursultan Ábishuly ishki ister organdaryn únemi qoldap, qyzmetkerlerdiń baspana máselesin sheshý, jalaqysyn kóterý, qyzmetine jaǵdaı jasaý syndy tustarda jan-jaqty qoldap otyrady. Polıtseıler osyndaı mártebege laıyq bolýy kerek dep oılaımyn», - deıdi SQO ІІD ınspektory polıtsııa aǵa leıtenanty Alısher Ismatuly Jarmaǵambetov.
Dál osy SQO-nyń tártip saqshylary «Parasatty polıtseı» respýblıkalyq baıqaýynda bas júldeni qanjyǵalady. 21 komandanyń ishinen úzdik dep tanylǵan top Prezıdent joldaýymen tuspa-tus kelgen jeńisterin Elbasyna arnaıtyndaryn jetkizdi.
«Tártip saqshylary bilimdi, bilikti, tártipke baǵynatyn jáne halqy úshin eńbek etetin qyzmet ıesi bolsa, búgingi jeńisimiz sonyń etalony bolmaq. Polıtsııa qyzmetkeriniń oń ımıdjin qalyptastyratyn, memlekettik til mártebesin arttyratyn osy konkýrsqa biz birneshe aı daıyndaldyq. 21 komandanyń ishinen top jarǵanymyz úshin óte qýanyshtymyn. Jyl ótken saıyn konkýrstyń da deńgeıi kóterilip, talap kúsheıip keledi. Aımaqtyq komandalar arasyndaǵy dostyq pen syılastyq ta bekı tústi. Búgingi jeńisimizdi Elbasynyń Joldaýyna qoldaý retinde arnaımyz»,- dedi SQO ІІD ınspektory.
Aıta keteıik, buǵan deıin Taldyqorǵanǵa elimizdiń barlyq óńirinen 200-den astam ishki ister organdarynyń qyzmetkerleri jınalyp, til dodasyna qatysyp jatqanyn habarlaǵan bolatynbyz. Baıqaýdyń maqsaty ishki ister organdarynda qyzmet etetin tártip saqshylarynpa qazaq tilin jetik meńgerýge yqpal etý. Sondaı-aq, kásibı termınderdi durys qoldanyp, qyzmettik qujattardy qatesiz rásimdeýdi úıretý bolyp tabylady. Al, kelesi jyly atalǵan baıqaýdy ótkizý quqyǵyna Mańǵystaý ІІD qyzmetkerleri ıe bolyp, kóshpeli rámizderin saltanatty túrde qabyldady.
