Qazaqstan Polshanyń shaǵyn bıznesti damytý tájirıbesin zertteýge alady
VARShAVA. QazAqparat - QR Prezıdenti Nursultan Nazarbaev Polshanyń shaǵyn jáne orta bıznesti damytýdaǵy tájirıbesine qyzyǵýshylyq tanytty, dep habarlaıdy «QazAqparat» tilshisi.
«Polsha úlken áleýetke ıe, sondyqtan Qazaqstan sizderdiń memleketpen saýda-ekonomıkalyq qarym-qatynastardyń damýyna úlken mán beredi. Polshanyń JІÓ-niń 67 paıyzyn shaǵyn jáne orta bıznes berip otyr, sol sebepti bizge shaǵyn jáne orta bıznesti damytýdyń polshalyq úlgisi óte qyzyq. Biz buǵan qyzyǵa qaraımyz. Men, jeke óz basym, Qazaqstan táýelsizdik alǵaly beri elimizde buryn-sońdy bolmaǵan shaǵyn jáne orta bıznestiń damýyna úlken kúsh salyp kelemin», - dedi Nursultan Nazarbaev Qazaqstan-Polsha bıznes forýmynda.
«Qazaqstan men Polshanyń naryqtyq ekonomıkaǵa kóshýdiń óz erekshelikteri bar. Polsha 1940 jylǵa deıin jeke ómir tájirıbesine ıe bolyp keldi. Qazaqstan óz tarıhynda ondaı bolmady. Sondyqtan adamdardyń sanasyn ózgertip, jeke-menshikke ıelik etý tájirıbesin kórsetý qajet boldy. Osy sebepti shaǵyn jáne orta kásiporyndardy qurý biz úshin mańyzdy edi, Qazaqstanda osy sektorda ekonomıkanyń tek 30 paıyzy jumys isteýde», - dedi Memleket basshysy.
Nursultan Nazarbaev polshalyq qatysýshylarǵa qaratyp aıtqan sózinde, Qazaqstanda shaǵyn jáne orta bıznestiń damýyna barlyq jaǵdaılar qarastyrylǵandyǵyn atap ótti. Atap aıtqanda, qolaıly jaǵdaılar jasaý maqsatynda, arnaıy ulttyq baǵdarlamalar qabyldanǵan. «Damý» atty arnaıy qor qurylǵan.
«Biz shaǵyn kásiporyndar úshin bank stavkalaryn sýbsıdııalaýdamyz. Ol 10-20 paıyz bolýy múmkin, biraq bıznes úshin ol árdaıym - 7 paıyz bolyp qala bermek. Bul - óte úlken qarajat. Menińshe, eshkim ondaı jaǵdaı jasap otyrǵan joq. Sizderdiń tájirıbelerińiz osy saladaǵy ózgeristerge yqpal jasaı alar edi. «Damý» qory men Polshanyń bıznesti damytý agenttigi atalǵan forým aıasynda memorandýmǵa qol qoıdy», - dedi Elbasy.
Eske sala keteıik, 22-23 tamyz kúnderi Nursultan Nazarbaev Polsha prezıdenti Andjeı Dýdanyń shaqyrtýymen Varshavada is-saparmen bolady. Qazaqstan-Polsha bıznes forýmyna 400-den astam kásipker qatysýda.
