Qazaqstan-Polsha bıznes forýmynda birqatar qujattar rásimdeldi
ASTANA. QazAqparat - Astanada qazaq pen polıak kásipkerleriniń forýmy bastaldy. Atalǵan shara Polsha prezıdenti Andjeı Dýdanyń Qazaqstanǵa memlekettik sapary aıasynda ótip jatyr. Tús qaıta bıznes forýmǵa eki eldiń basshylary qatysady dep boljanýda, dep xabarlaıdy QazAqparat tilshisi.
Forýmnyń birinshi bóliminde eki eldiń ókilderi bir-birine óz artyqshylyqtaryn tanystyryp, birlesken baılanystarǵa negiz bolatyn salalardy pysyqtap shyqty. Osydan keıin Qazaqstan men Polshanyń birqatar kompanııalary arasynda yntymaqtastyq týraly kelisimderge qol qoıyldy.
Atap aıtqanda, Pavlodar oblysynda "Agroqalashyq" baǵdarlamasyn iske asyrý, "KazakhInvest" pen "PolPharma" arasyndaǵy yntymaqtastyq, "Qazposhta" men "Polsha poshtasy" arasyndaǵy áriptestik, Qazaqstannyń syrtqy saýda palatasy men PTAK Warsaw EXPO arasynda baılanys ornatý jáne basqa da barlyǵy 10 qujat rásimdeldi. Sonyń ishinde FTC Equity men Soldir arasynda alma baqtaryna tamshylap sýarý júıesin jetkizý kelisimi de bar.
Aıta ketken jón, Pavlodar oblysynda "Agroqalashyq" baǵdarlamasyn iske asyrý kelisimi aıasynda Ekibastuzda jańa oqý ornyn ashý josparlanyp otyr. Ol jerde aýyl sharýashylyǵy salasyndaǵy mamandar daıarlanbaq .
Budan bólek, polıak kásipkerleri Astananyń mańaıynda alyp jylyjaıdy salýǵa bel baılap otyr.
